Саха Өрөспүүбүлүкэтин төрүттэспит Максим Кирович Аммосов биир дойдулаахтара Эҥсиэли быйаҥнаах хочотун олохтоохторо, намнар дойду олоҕор улахан суолталаах куоластааһыҥҥа бэлэмнэнэ сылдьаллар.
Арассыыйа Төрүт Сокуонугар киириэхтээх уларытыы туһунан Нам улууһун бочуоттаах олохтооҕо, тыыл уонна үлэ бэтэрээнэ, Партизан нэһилиэгин Ытык киһитэ Клара Афанасьевна Николаева-Дмитриева санаатын бу курдук этэр:
— Мин от ыйын 1 күнүгэр РФ Төрүт Сокуонугар киирэр уларыйыылар иһин куоласпын биэрээри олоробун. Билигин урукку олох буолбатах, сайдыы балысханнык бара турар, онно сөп түбэһиннэрэн, Төрүт Сокуоммут уларыйара оруннаах. Урукку быыбардарга төһө да саастаах буолларбын, бэйэм баран куоластааччыбын.
Быйыл аан дойду үрдүнэн коронавирус диэн саҥа дьаҥ тарҕанан, дьэ түрүлүөн бөҕөтүн таһаарда. Ону учуоттаан, элбэх дьону-сэргэни биир сиргэ муспат туһугар куоластааһын бэс ыйын 25 күнүттэн саҕалаан, сэттэ күн устата барар диэн хаһыаттан ааҕан, тэлэбиисэринэн көрөн билэ олоробун. Бу сөптөөх дьаһаныы диэн сыаналыыбын.
Тус бэйэм от ыйын 1 күнүгэр дьиэбэр куоластыырга бэлэммин. Дьоммун-сэргэбин Төрүт Сокуон уларыйыыларыгар бэйэҕит санааҕытын бары биир киһи курдук кэлэн биллэрэргитигэр, куоластыыргытыгар ыҥырабын! Бары чэгиэн-чэбдик буолуҥ!
edersaas.ru