«Өлүөнэтээҕи холбоһуктаах пароходство» ААУо «Жатай — Төхтүр» хайысхатынан ледокол арыаллаан сылдьар парома муус хабалатыгар ылларан, сорох пассажирдар сатыы Төхтүргэ таҕыстылар.
Аны социальнай ситимнэринэн биир киһи паромҥа тоҥон өлбүт үһү диэн сураҕы тарҕаттылар. Ykt.ru суруйарынан, СӨ быыһыыр сулууспата иһитиннэрбитинэн, паромунан айаннаан испит дьахтар эмискэ ыалдьыбыт. Быыһааччылар тутатына дьахтары Төхтүргэ илдьибиттэр.
Билигин Жатай уонна Төхтүр аннынан өрүс кытылыгар быыһыыр сулууспа үлэһиттэрэ дьуһуурустубалыыллар. Итиэннэ дьон киирэн иттэригэр анаан балаакка туруорбуттар.
Оттон «Полярные авиалинии» АХ бүгүн биэс рейси Аллараа Бэстээххэ оҥордо. Уопсайа 218 пассажиры таспыттарын туһунан хампаанньа пресс-сулууспата иһитиннэрдэ.
Сэтинньи 5 күнүгэр Дьокуускайтан бастакы рейс сарсыарда 9 чаастан оҥоһуллуоҕа. Билиэт сыаната 2000 солк.
Хаартыска: интэриниэттэн