СӨ тырааныспарга министиэристибэтэ иһитиннэрбитинэн, “Паромы Якутии” диэн мобильнай сыһыарыы баар буолла. Google Play уонна AppStore платформалартан хачайдыахха сөп. Ону тэҥэ, паром сырыытын, рейстэр бириэмэлэрин, тарыыптары, о.д.а. информацияны paromonline.sakha.gov.ru саайтка киирэн көрүөххэ сөп.
Бу сервискэ Өлүөнэ өрүскэ Дьокуускай-Аллараа Бэстээх, Хачыкаат-Мохсоҕоллоох уонна Бүлүү өрүскэ паром сырыыта көстөр. Холобур, паром бу кэмҥэ ханна тиийбитин, хаска кэлэрин көрүөххэ сөп. Ол туһуттан паромнарга анал трекердэри холбууллар.
Ону тэҥэ, Дьокуускай, Аллараа Бэстээх бириистэннэригэр төһө массыына мустубутун көрөргө видеокамералар туруорулуннулар. Онон өрүһү туоруур айанньыттарга сүрдээх табыгастаах сыһыарыылар эбит. Холобур, киин куоракка оптуобустар ханна тиийбиттэрин, хас мүнүүтэнэн кэлэллэрин көрдөрөр «Умный транспорт» диэн сыһыарыы дьоҥҥо олус туһалаах. Бытарҕан тымныыга тохтобулга тоҥо турбакка, оптуобус хас мүнүүтэнэн кэлэрин суоттаан, сөпкө тахсаҕын. Онон бу паромнар сыһыарыылара эмиэ дьон айанын чэпчэтиэ, бириэмэлэрин харыстыа диэн эрэниллэр.
Сайын устата өссө атын да өрүстэри туоратар паромнар сырыылара бу сыһыарыыга холбонон, көстөн иһиэхтэрэ.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru