Сыана бэлиитикэтин судаарыстыбаннай кэмитиэтин пресс-сулууспатын кытары сибээскэ тахса сылдьыбыппытыгар, Дьокуускай – Аллараа Бэстээх хайысхатынан паромунан тиэхиньикэни уонна пассажирдары таһыыга быйылгы навигацияҕа тарыыптар олохтоммуттарын иһитиннэрдилэр.
Дьокуускай – Аллараа Бэстээх хайысхатынан паромунан айанныыр пассажирдарга билиэт сыаната 135 солкуобай буолбут. Оҕолорго (5 – 10 саастаах) 68 солк. Биэс сааһыгар диэри оҕолор босхо айанныыллар. Былырыын улахан дьоҥҥо билиэт сыаната 122 солк. этэ.
Санатан эттэххэ, хас да сылы быһа паром тарыыба үрдээбэккэ турбута.
Салгыы легковой уонна таһаҕаһы тиэйэр массыыналары паромунан туоратыы сыаналарын көрүөххэ.
Сыана тиэхиньикэ ыйааһыныттан тутулуктаах. Ол курдук легковой массыыналарга тарыып 400-тэн 1390 солк. диэри халбаҥныыр. Холобур, 1,1 туоннаттан 1,3 туоннаҕа диэри ыйааһыннаах легковой массыынаны туоратыы 440 солкуобай. Былырыын легковой массыыналарга 340-тан 1275 солк. диэри этэ.
Таһаҕаһы тиэйэр массыыналарга сыана 2016 сылтан үрдээбэккэ турар. Тарыып 405 солк. саҕаланар.
Пассажирдары таһар оптуобустар сыаналара эмиэ уруккунан хаалбыт — 1 535 солкуобайтан 2 730 солкуобайга диэри.
Контейнер 320 – 3 085 солк. Биир туонна таһаҕас ортотунан 340 солк. быһыллыбыт (эмиэ уруккунан хаалбыт).
Онон быйыл пассажирдары уонна легковой массыыналары таһыы тарыыба эрэ үрдээбит.
edersaas.ru