Паром сырыытын, айан сыанатын, таһаҕаһы тиэйиини, хантан, хаска айанныырын «Паромы Якутии» сыһыарыыттан билиэххэ сөп. Сыһыарыы төлөпүөҥҥэ Google Play уонна AppStore электроннай маҕаһыыннартан хачайданар диэн СӨ Тырааныспарка министиэристибэтэ иһитиннэрэр.
Сыһыарыыны өрөспүүбүүкэтээҕи инфокоммуникационнай технологиялар кииннэрэ оҥорбута. Билигин бу нөҥүө Дьокуускай — Аллараа Бэстээх, Хачыкаат — Мохсоҕоллоох, Кангаласс — Оҕуруоттаах, Бөтүҥ — Амма уонна Уус-Майа — Элдьикээн хайысхаларынан устар паром сырыыларын көрүөххэ сөп. Маныаха бу паромнарга анал трекердэр холбоммуттара көмө буолар.
Навигационнай сезон сабыллыар диэри сыһыарыыга өссө да атын хайысхалар эбиллиэхтэрэ.
Маны сэргэ, «Паромы Якутии» сыһыарыыга Дьокуускай — Аллараа Бэстээх хайысханан туоруур сиргэ аҕыс камера баар, онон сырыыны, айаны, уочараты кэтиэххэ сөп.
Ил Дархан уонна Бырабыыталыстыба дьаһалтатын пресс-сулууспата.