Өлүөнэҕэ гидрологическай балаһыанньа кытаатан, алтынньы 29 күнүттэн чааһынай судоходнай хампаанньалар аны сааска диэри үлэлэрин тохтоттулар. Урукку сыллардааҕар өссө уһуннук, эриһэн туран хойуккааҥҥа диэри үлэлээтилэр.
Билигин «Өлүөнэтээҕи холбоһуктаах пароходство» ААУо бааржата Дьокуускай – Төхтүр хайысхатынан сылдьан эрэр. Бааржаны ледокол арыаллыыр буолан, күҥҥэ аҕыйах рейс оҥоһуллар.
Паромунан айан сыаната сайыҥҥытааҕар лаппа үрдээтэ. Холобур, «Москвич», «Жигули», «Нива» уонна да атын маныаха маарыҥныыр мааркалаах, ыйааһыннаах массыыналары туоратыы сыаната 3800 солк., «Волга» – 5600 солк. (уо. д.а.), «УАЗ» кылаастаах массыыналарга (легковой) – 6200 солк., таһаҕаһы, дьону тиэйэр, ол иһигэр санитарнай «УАЗ», «Джип» массыыналарга – 8000 солк. быһыллыбыт.
Таһаҕаһы тиэйэр улахан массыыналары туоратыы бас быстар сыаналаах. 7 миэтэрэҕэ диэри уһуннаах улахан массыынаҕа – 17550 солк., 15 миэтэрэттэн уһун – 78000 солк., 25 миэстэлээх оптуобуска – 10400 солк., 25 миэстэттэн үөһээ – 14000 солк., 40 туоннаҕа диэри ыйааһыннаах бульдозер – 61200 солк., 40 туоннаттан үөһээ ыйааһыннаах бульдозер – 69000 солк. Дьэ, сыана, доҕор!
Анивера Акимова, «Саха сирэ» хаһыат, edersaas.ru