Бу чааска үһүс күннэрин Өлүөнэ өрүскэ паромҥа хаайтарбыт дьон биэрэги этэҥҥэ буллулар.
edersaas.ru
Бу туһунан Чурапчы ыччата Александр массыынатын паромтан таһааран баран биллэрдэ.
— Дьэ, олохпор хаһан да умнубат сырыы буолла! Ыксаллаах түгэҥҥэ дьон бэйэ-бэйэтигэр сыһыана арылхайдык арылынна. Паром «олохтоохторо» бары бэйэ-бэйэбитин өйөһө олордубут. Сомоҕолоһуу күнүгэр араас омук дьоно, кырдьык да, сомоҕолоһуулаахпытын көрдөрдүбүт. Ол курдук, паромҥа араас норуот бэрэстэбиитэлэ бааллар. Бары биир кыһалҕалаах дьон быһыытынан бэйэ-бэйэбитигэр ким туох кыахтааҕынан көмөлөстүбүт: ким солярка бэрсэр, ким балык кэнсиэрбэтин, паачыка чэйин, килиэбин кытта үллэстэр. Биир бэйэм «доширагы» көрүөхпүн да баҕарбат буоллум. Чурапчым сүөһүтүн эмис этин аҕынным аҕай. Түгэннинэн туһанан, истиҥ махталбын «Кэпсэтии-Сэһэргэһии» батсаап бөлөҕөр өйөбүллэрин иһин истиҥ махталбын тиэрдиэм этэ. Миигин:
» Чуҥкуйума, кытаат!» — диэн санаабын көтөҕөн, саататаары таабырын да таайтардылар, араас оонньууну да тэрийдилэр. Ону тэҥэ барҕа махтал «Эдэр саас» сайт суруналыыстарыгар! Кыһалҕаҕа түбэспит дьоҥҥо болҕомто ууран, өрөспүүбүлүкэҕэ анаан сырдата олорбуттарыгар. Ол да иһин буолуо, билэр дьоммуттан кинилэр матырыйаалларын хастыыны да тута олордум. Махтал буоллун эһиэхэ барыгытыгар, үтүө санаалаах дьон! — диэн сэһэргэһээччим биир тыынынан кэпсээн кэбистэ.
Араспаанньатын эппэтэх Чурапчы ыччата Александрга, муус билиэнигэр ылларан олорон, биир кыһалҕалаах дьонун өйүү, биһиги сайтпытыгар бэртээхэй видео уонна хаартыска матырыйааллары ыытан, репортаж оҥоро олорбутугар бэйэтигэр эмиэ махталбытын тиэрдэбит. Тапталлаах төрөөбүт дойдугар Чурапчыга этэҥҥэ айаннаан тиий дуу, Александр!
Елена ПОТОЦКАЯ, «Саха сирэ» хаһыат, edersaas.ru