“Дьокуускай – Аллараа Бэстээх” Өлүөнэни туоруур сиригэр паром үлэтин бэрээдэктиир саҥа ньыма үлэҕэ киирдэ.
edersaas.ru
Ол курдук, паромҥа киирэр массыыналары мунньар биир тиһик – «накопитель» үлэлээтэ.
Өрөспүүбүлүкэ Бырабыытылыстыбатын бэрэссэдээтэлин эбээһинэһин толорооччу Андрей Тарасенко бу туһунан маннык эттэ: «Ил Дархан паромҥа киириигэ пассажирдарга, суоппардарга куттал суох буолуутун тэрийиҥ диэн сорудахтаабыта. 2020 сыл навигацията түмүктэнэн эрэр. Онон кыһыҥҥы суол-иис арыллыытыгар бэлэмнэнэбит. Билигин өрүһү туоруур паром үлэтин бэрээдэктииргэ үлэ барда».
«Накопитель» үс балаһаттан турар. Мантан үһэ таһаҕас таһар ыарахан ыйааһыннаах массыыналарга, онтон үһэ – чэпчэки массыыналарга ананан оҥоһулунна. Бу балаһаларга мустубут массыына утуу-субуу паромҥа киириэхтээх.
Бу тиһик эҥкилэ суох үлэлиирин туһугар таһааччылар, Тырааныспар министиэристибэтэ, Дьокуускай куорат уонна Мэҥэ Хаҥалас салалтата бииргэ үлэлэһии дуогабарын баттастылар.
Дуогабар быһыытынан, суудуналар биир кэлим тиһигинэн сылдьыахтара, тарыыптара тэҥнэһиэ, төлөбүрү кытылга ылар буолуохтара. Паром тиксэр сирэ, кэмэ эмиэ чуолкайданыа. Бириистэннэри оҥоруу, тупсарыы, аһыыр-сиир сирдэри үлэлэтии эмиэ бары ирдэбилгэ сөп түбэһэн оҥоһуллара күүтүллэр.
«Дьон-сэргэ паромунан сылдьарыгар табыгастаах усулуобуйаны тэрийиэхпит. Инникитин маннык ньыманы Саха сирин атын өрүстэригэр эмиэ киллэриэхпит. Инньэ гынан өр сылларга олоҕурбут паром сырыытын систиэмэтэ уларыйыа», — диэн Андрей Тарасенко түмүктээн эттэ.
Ирина Ханды, “Саха сирэ” хаһыат, edersaas.ru
Хаартыска: Интэриниэт ситимиттэн