Бүгүн Ил Түмэн XXIX уочараттаах пленарнай мунньаҕар парламент бэрэссэдээтэлинэн Алексей Еремеев талылынна.
Алексей Еремеев Ил Түмэн депутатынан талыллан 2013 сылтан үлэлиир. Бэһис уонна алтыс ыҥырыылаах мунньахтарга кини Судаарыстыбаннай тутуу уонна сокуон кэмитиэтин бэрэссэдээтэлинэн үлэлээбитэ. Алексей Ильич бэйэтин этиитигэр кэмитиэттэр үлэлэрэ өссө көдьүүстээх буолуохтааҕын, Госдуманы, Федерация Сэбиэтин, СӨ бырабыыталыстыбатын, улуустары кытары биир тиһиктээх үлэ барыахтааҕын бэлиэтээтэ:
– Алтыс ыҥырыылаах мунньах былааннаммыт үлэтэ салҕанан барыаҕа. Бэйэм өттүбүттэн эттэхпинэ, бастатан туран, сокуон бырайыактарын оҥорууга күүскэ үлэлэһиэхпитин наада. Тоҕо диэтэргин, пленарнай мунньахтарбытыгар элбэх сокуон бырайыага төттөрү эбии оҥорууга барар этэ. Ити инники ыҥырыылаах мунньахтары кытары тэҥнээтэххэ, икки бүк улахан. Холобур, бу иннинээҕи ыҥырыылаах мунньахтарга иккилии-үстүү сокуон бырайыага эбии оҥорууга ыытыллар эбит буоллаҕына, билигин тоҕустуу сокуон бырайыагар тиийэ төттөрү утаарыллар. Онон кэмитиэттэри кытары үлэ күүһүрдүллүөхтээх, сокуон бырайыактарын кэмитиэт иһинэн ырытыы биир сүрүн миэстэни ылыахтаах. Ону сэргэ федеральнай структураны кытары үлэни күүһүрдүөхпүтүн наада. Билиҥҥи туругунан, федеральнай сокуоннар алта бырыһыаннарын эрэ биһиги хабан олоробут. СӨ бырабыыталыстыбатын кытары үлэбитин эмиэ саҥаттан көрүөхпүт. Мин санаабар, бырабыыталыстыбаннай чаастарынан наһаа үлүһүйбэккэ эрэ бу ньыманы туһанан үлэни көдьүүстээхтик ыытыахпытын сөп. Биир ойуччу миэстэни улуустарбытын, олохтоох бэйэни салайыныыны кытары үлэлэһиигэ ууруом этэ. Олохтоох депутаттар бэйэлэрэ эмиэ сокуон бырайыагын хайа баҕарар киллэрэр, дьүүлгэ таһаарар бырааптаахтар эрээри, билиҥҥитэ ити үлэ суоҕун кэриэтэ. Манна Ил Түмэҥҥэ уокуруктартан талыллыбыт депутаттар күүскэ үлэлэһиэхтээхтэр дии саныыбын, – диэн иһитиннэрдэ.
Аграфена КУЗЬМИНА