Парашютунан ыстанарга, ойуур баһаарын умулларарга үөрэттилэр

Бөлөххө киир:

«Авиалесохрана» үөрэтэр киинигэр саҥа киирбит үлэһиттэри парашютист баһаарынай идэтигэр үөрэттилэр. Ленскэй, Өлүөхүмэ, Амма, Таатта, Үөһээ Бүлүү, Уус Майа улуустарыгар уонна Покровскайга баар авиа-салаалар саҥа каадырдара бу 24 хонуктаах кууруска үөрэннилэр. Бэлэмнэнии уонна үөрэтии үлэтин ойуур баһаарын умуруорууга уопуттаах исписэлиистэр ыыталлар.

Үрдүк вышка-тренажер, ыстанар трамплин көмөтүнэн эдэр үлэһиттэри хайдах парашютунан түһэргэ, ыстанарга үөрэттилэр. Үөрэх түмүгүнэн таһымы үрдэтии туһунан анал докумуон бэриллэр. Манна ортотунан 30 саастаах ыччат дьон үөрэнэр. Билигин бу кууруска үөрэммит эдэр каадырдар эксээмэннэрин туттаран, аны быраактыкаларын баран эрэллэр эбит.

«Авиалесохрана» Дьокуускайдааҕы салаатын кэтээччи-лүөччүк Николай Копырин санаатын үллэһиннэ:

— Биһиги үлэҕэ киириэн баҕалаахтары сүүмэрдиирбитигэр сүрүн ирдэбил быһыытынан аармыйаҕа сулууспаны уонна орто үөрэх дьупулуомун көрөбүт. Ону кытта анал мэдиссиинискэй хамыыһыйаны ааһаллар. Онтон ыҥыран кэпсэтэбит. Үлэҕэ киирээччи инникитин эмиэ көрөбүт, салгыы бу киһини ханнык дуоһунаска аныахха сөбүн көрөн, ону учуоттаан үлэҕэ ылабыт. Баҕар, кини кэтээччи-лүөччүк, баҕар хамаанда инструктора буолуо. Итиннэ кинилэр бэйэлэрин үчүгэйдик арыйан көрдөрөллөрө эмиэ улахан тутулуктаах. Бэлиэтээн эттэххэ, бу доруобуйаны көрдөрөр мэдиссиинискэй хамыыһыйаны сыл ахсын ааһаллар. Таһымы үрдэтэр анал кууруспут 24 хонуктаах. Бүгүҥҥүттэн саҕалаан курсаннарбытыгар Хаҥалас улууһун Нөмүгүтүгэр ыстаныы үлэтэ ыытылла турар.

Ульяна ЗАХАРОВА.

+1
0
+1
0
+1
0
+1
0
+1
0
+1
0
+1
0