ВИДЕО: Үөһээ Бүлүүгэ аттаах параат буолла

Бөлөххө киир:

Бүгүн, Москваҕа Кыайыы 75 сылыгар анаммыт параат буолар турар кэмигэр, Үөһээ Бүлүү сэлиэнньэтигэр 75 аттаах киһи парааттаата.

Edersaas.ru

Аттаах дьон улуус 12 нэһилиэгиттэн мустубуттар. Бэҕэһээ эрэпэтииссийэ курдук мустан, аттарын кытта туран, баараҕай 75 диэн сыыппараны ойуулаан көрдөрбүттэрэ.

1941 сыл сайыныгар бу курдук аттаах дьон мустан, Ийэ дойдуларын көмүскүү, сэриигэ барбыттара. Кинилэр кэриэстэригэр бу курдук аттаах параады тэрийэр идиэйэ үөскээбитэ.

Ол курдук аттаах дьон сэрии саҕанааҕы байыаннай гимнастеркалаахтар, пилоткалаахтар. Үөһээ Бүлүү сэлиэнньэтин икки уһун уулуссатынан, кыһыл былааҕы күөрэччи көтөхпүт хамандыырдарын бастыспытытынан, субуруччу хаамтардылар. Олохтоохтор уулусса кытыытынан туран, кинилэри уруйдуу-айхаллыы, «ураа» хаһыынан көрүстүлэр, үөрдүлэр-көттүлэр. Кырдьык да, 75 аттаах киһи субуһан, ат симэҕэ күн уотугар күлүмүрдээн, айаннатан долгутан ааспыттара көрүөххэ астык.

Сылгыһыттар сорохторо киэһэ буолар ат сүүрдүүтүгэр кыттыахтаахтар. Ат сүүрдүүтэ көрөөччүтэ суох, онлайн-эрэсииминэн ыытыллыахтаах.

Улуус салалтата бу тэрээһиҥҥэ үчүгэйдик бэлэмнэммитэ көстөр. Көстүүмнэрин, ат киэргэлин тиктэрии, булуу-талыы элбэх үлэттэн тахсара өйдөнөр. Манна нэһилиэктэр көхтөөх кыттыыны ылбыттара үөрдэр.

Бу түгэҥҥэ документальнай киинэ уһулунна. Сэриигэ атаарыы, бырастыылаһыы сценалара уһулуннулар, оччотооҕу кэм, холкуос олоҕо-дьаһаҕа көстүөхтээх.

Ангелина Васильева, “Саха сирэ” хаһыат, edersaas.ru

Хаартыска: интэриниэттэн.

+1
0
+1
0
+1
0
+1
0
+1
0
+1
0
+1
0