Саха сиригэр олорор дьиэлэри уонна социальнай эбийиэктэри тутуу ыытыллар. Тутар тэрилтэлэр үлэлээбиттэрин курдук үлэлииллэр. Ол эрээри пандемия кэмигэр ыарахаттары көрүстүлэр. Бу салааны федеральнай уонна олохтоох таһымҥа өйүүр баҕалаахтар.
edersaas.ru
Айсен Николаев муус устар 22 күнүгэр өрөспүүбүлүкэ миниистирдэрин кэбиниэтин кытта сүбэ мунньаҕы ыытта. Эрэгийиэн баһылыга эпидемияттан сылтаан көрсүбүт сүрүн кыһалҕалары көрдө уонна сорудахтары биэрдэ.
Өрөспүүбүлүкэ тутууга миниистирэ Павел Аргунов этэринэн, харантыыҥҥа олоорор Алдантан уратыга эбийиэктэри тутуу былаан быһыытынан ыытыллар. Быйыл 9 оскуоланы, 4 уһуйааны, култуура 3 эбийиэгин, успуорт 6 эбийиэгин үлэҕэ киллэрэргэ былаанныыллар. Дьокуускай куоракка онкодиспансер уонна кардио-киин тутуллар.
Тутууну өйүүргэ дойду баһылыга кэлимсэ миэрэлэри ылынар. Ыам ыйын 1 күнүттэн 6,5% чэпчэтиилээх ипэтиэкэ үлэлиэҕэ. Быйыл судаарыстыба Албыннаппыт кыттыгас өлүүлэһээччилэри өйүүр сыалтан 30 млрд солкуобайы эбии көрдө. Онон бу үбүнэн ситэ тутуллубатах дьиэлэри тутуохтара.
Эрэгийиэммитигэр тохтоотоххо, өрөспүүбүлүкэ вице-премьерэ Кирилл Бычков салалтатынан бу салааны өйүүр миэрэлэр оҥоһулуннулар. Итилэр ортолоругар – нолуок төлөбүрүгэр уһатыыны биэрии, итиннэ нолуоктары киллэрэн туран.
Бүгүн өрөспүүбүлүкэҕэ 872 омук киһитэ уонна 1019 олохтоох киһи тутууга үлэлиир. Өссө 1943 киһиэхэ наадыйаллар. Тиийбэт үлэһиттэр оннуларыгар үлэтэ суохтары уонна тутар этэрээт байыастарын үлэлэтээри гыналлар.
Айсен Николев орто анал үөрэх тэрилтэлэригэр кылгас куурустары Дьокуускайга уонна оройуоннар кииннэригэр тэрийэргэ соруйда.
Социальнай суолталаах эбийиэктэри сэргэ эрэгийиэҥҥэ элбэх кыбартыыралаах дьиэлэри тутуу салҕанар – быйыл 500 тыһ. кв м үлэҕэ киллэриэхтэрэ. Бу эргэ дьиэлэртэн көһөөччүлэр, тулаайах оҕолор уонна өлүүлэһэн тутуу.
Саахалланар туруктаах дьиэлэр бырагыраамаларын туһунан этэригэр Николаев дьон бүгүн кыбартыыраларын иһин уу харчынан ылыахтарын сөбүн эттэ. Кини бу ньыманы судургутутарга сорудахтаата. Ону тэҥэ олохтоох матырыйааллары туһаныыга үлэ күүскэ барыахтаах.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Женни СТРЮКОВА, “Саха сирэ” хаһыат
Хаартыска: саайтан