Сүрүн Уопсастыба

Соҕуруу Америкаҕа пандемия күүһүрдэ

COVID-19 ыарыынан сутуллубут дьон ахсаана бүгүн, бэс ыйын 16 күнүгэр, аан дойду үрдүнэн 8 мөлүйүөнү аһарда. Джон Хопкинс университета ааспыт күн чахчыларын түмэн, 8 003 021 киһи ыалдьыбытын туһунан биллэрдэ.

Аан дойдуга ыалдьыбыт дьон ахсаана 7 мөлүйүөннээх кирбиини бэс ыйын 8 күнүгэр аһарбыта, оттон 6 мөлүйүөн киһи ыалдьыбытын туһунан ыам ыйын 30 күнүгэр биллибитэ. Мантан сылыктаатахха, ыарыы уҕарыыра өссө даҕаны ыраах быһыылаах.

Билигин ыарыы тарҕаныытын таһыма Соҕуруу Америка дойдуларыгар түргээтээтэ — Бразилия, Мексика, Чили ыарыһахтарын ахсаана нэдиэлэҕэ 40-50% эбиллэн иһэр. Бразилия, аан дойду үрдүнэн ыытыллар статистика көрдөрөрүнэн, сутуллубут дьон ахсаанынан иккис миэстэҕэ тахсан турар. Билигин Бразилияҕа 900 тыһыынча кэриҥэ киһи ыалдьыбыт. Бу көрдөрүү соторунан бытаарар сибикитэ суох.

Азияҕа биир саамай улахан нэһилиэнньэлээх дойду — Индия эмиэ эмискэ элбэх ыарыһахтаах дойдулар ахсааннарыгар киирдэ. Бу дьадаҥы уонна ыкса олорор нэһилиэнньэлээх дойду коронавирус маҥнай турбут ыйдарыгар атын дойдулары кытта тэҥнээтэххэ, ыарыытын таһыма олус намыһаҕа учуонайдары улаханнык мунаардыбыта. Муус устар ортотуттан Индияҕа харантыын миэрэлэрин сымнатыы саҕаламмыта. Билигин бу дойдуга 300 тыһыынчаттан тахса киһи сутуллубута биллэр, ыалдьыбыт дьон ахсаана күн аайы элбээн иһэр. Эспиэрдэр бу дойдуга коронавирус хойутаан кэлбитин эбэтэр бу ыарыы иккис долгуна буоларын туһунан мөккүһэллэр.

Ыарыы саҕаламмыт Кытайыгар короновирус балаһыанньата лаппа ордук эрээри, дойду дьаҥтан толору ыраастанна диир сатаммат. Сотору-сотору дойду араас уһугар уонунан сутуллубут дьон көстөр. Аҕыйах хонуктааҕыта Пекин кууһунан эргинэр ырыынагар сутуллубут дьон көстөн, онно сылдьыбыт тыһыынчанан атыылаһааччылары харантыыҥҥа хаайбыттара. Кытайга пандемия саҕаланыаҕыттан 84,3 тыһыынча киһи саҥа ыарыыга сутуллубута.

Егор Карпов, edersaas.ru

0
0
Telegram Whatsapp

Добавить комментарий