РФ доруобуйатын харыстабылын миниистирэ Вероника Скворцова сэтинньи 15 күнүгэр РФ бырабыыталыстыбатын мунньаҕар “Арассыыйа Федерациятыгар гражданнар доруобуйаларын төрүтүн туһунан” сокуоҥҥа ылыллыахтаах уларытыылар тустарынан иһитиннэрдэ. Паллиативнай медицинскэй көмө көрүҥнэрэ чопчуланыахтара.
Доруобуйа харыстабылын тэрилтэтин (ВОЗ) резолюциятыгар сөп түбэһиннэрэн, сокуоҥҥа киллэриллэр уларыйыылар “паллиативнай медицинскэй көмө” өйдөбүлүн кэҥэтэллэр, кыайан эмтэниллибэт ыарыһахтар социальнай хааччыллыыларын бэрээдэгин чопчулууллар. Ол иһигэр, олох хаачыстыбатын тупсарарга, ыарыытын уонна ыарыы атын да ыарахан бэлиэлэрин чэпчэтэргэ анаммыт медицинскэй орооһуу уонна психологическай характердаах дьайыылар буолуохтара (наркотическай уонна психотропнай эмтээх препараттары киллэрэн туран).
Паллиативнай көмөнү амбулатория усулуобуйатыгар, ол иһигэр дьиэлэригэр уонна сытар балыыһа усулуобуйатыгар, оҥоруу кыаҕа быһаарыллар. Гражданнар медицинскэй көмөнү босхо оҥоруу судаарыстыбаннай мэктиэлэрин бырагырааматын чэрчитинэн күнүскү стационар усулуобуйатыгар эмтээх препараттары туһаныахтара.
Сокуон барыла доруобуйа харыстабылын эйгэтигэр эмчиттэр социальнай хааччыйыы үлэһиттэрин, уопсастыбаннай тэрилтэлэр уонна коммерческайа суох тэрилтэлэр бэрэстэбиитэллэрин кытары хардарыта бииргэ үлэлээһин боппуруостарын бэрээдэктиир.
Вероника Скворцова сокуон барыла паллиативнай медицинскэй көмө тоҕоостоох буоларыгар уонна хаачыстыбата үрдүүрүгэр тириэрдиэҕин бэлиэтээтэ.
ЫСПЫРААПКА:
Паллиативнай көмө – олоххо кутталлаах ыарыылаах киһи (оҕолор уонна улахан дьон) уонна кини дьиэ кэргэнин олоҕун хаачыстыбатын тупсарарга көмөлөһөр көрүҥ (ыарыыны эрдэттэн быһааран, ыарыһах эрэйин-муҥун суох оҥоруу эбэтэр чэпчэтии, психосоциальнай уонна духуобунай өйөбүл көмөлөрүнэн) .
Надежда ЕГОРОВА, “Саха сирэ” хаһыат, edersaas.ru