Саха сиригэр паллиативнай мэдиссиинэни үөрэтэр форума аһылынна
Бүгүн, балаҕан ыйын 5 күнүгэр, Дьокуускайга Уһук Илиҥҥи IV Паллиативнай мэдиссиинэни үөрэтэр форум үлэтин аста. Бу форуму Арассыыйа Федерациятыгар 2016 сылтан Хосписнай көмөҕө идэтийэр кыттаачылар Ассоциациялара Арассыыйа Доруобуйа харыстабылыгар министиэристибэтин кытта бииргэ ыытар. Форумҥа эмтэммэт уонна уһун кэмнээх ыарахан ыарыылаахтарга көмө оҥорор исписэлиистэри эмтээһин уонна көрөөһүн саҥа ньымаларыгар үөрэтэллэр. Үс сыл иһигэр маннык форумнарга 8525 киһи кыттыбыт.
Форум үлэтэ Госдуума дьокутаата Галина Иннокентьевна Данчикова эҕэрдэ тылыттан саҕаланна. Галина Иннокентьевна Арассыыйаҕа паллиативнай көмө туһунан саҥа сокуон үлэҕэ киирбитинэн, бу салааҕа күүстээх уларыйыылар тахсыахтара диэн эрэлин биллэрдэ. Саҥа сокуон паллиативнай көмө поликлиникаларга эрэ буолбакка, дьиэлэригэр сытар ыарыһахтарга эмиэ тэҥ кэриҥнээх көмө тиийэригэр көмөлөһүөхтээҕин эттэ. Саха Өрөспүүбүлүкэтигэр, сир киэнинэн, суол уустугунан сибээстээн, маннык көмөнү дьоҥҥо оҥоруу атын эрэгийиэннэрдээҕэр ыараханын туспа бэлиэтээтэ.
Ити кэнниттэн форум биир сүрүн лиэктэрэ, Хосписнай көмөҕө идэтийэр кыттаачылар Ассоциацияларын бырабылыанньатын бэрэссэдээтэлэ, наука хандьыдаата Диана Владимировна Невзорова Уһук Илин эрэгийиэнигэр бу салааҕа өр сылларга үлэлээбит мэдиссиинэ үлэһиттэрин бочуоттах грамоталарынан наҕараадалаата. Бурятияттан, Владивостоктан, Красноярскайтан уонна да атын сирдэртэн кэлбит быраастары, санитардары сыанаҕа ыҥыран эҕэрдэлээтилэр.
Диана Владимировна паллиативнай көмө мантан ыла сайдар хайысхатын туһунан кылгастык маннык диэтэ:
— Паллиативнай көмө аҥардас ыарыыны эрэ аччатыынан дьарыктаныа суохтаах. Маннык көмө өйдөбүлүгэр ыарыһахха медицинскэй, социальнай уонна психологическай өйөөһүн барыта киирэр. Урут бастаан араак ыарыылаахтарга көмөлөһөр хоспистары эрэ тэрийэр этибит, билигин эмтэммэт ыарыыга ылларбыт дьон олохторун чэпчэтиэхтээхпит. Дойдубут бэрэсидьиэнэ мэдиссиинэ бу салаатын сайыннарыыны билиҥҥи кэм биир сүрүн соругунан биллэрдэ. Ити сөптөөх быһаарыныы – эмтэммэт ыарыһахтар олохторо чэпчээһинэ уопсастыбыны барытын тупсарар, ыарыһахтар аймахтарын олоҕо эмиэ тупсар, дьон инники диэки эрэллээхтик көрөр буолар.
Форум кыттыылаахтара биир күн иһигэр уонтан тахса лиэксийэни истиэхтэрэ. Москваттан кэлбит мэдиссиинэ үрдүк үөрэхтээх исписэлиистэр уонна маннааҕы үлэлиир быраастар, эмтээһин ньымаларын, үлэни тэрийээһини, саҥа сокуону хайдах тойоннуур туһунан дакылааттарыгар ырытыахтара.
Егор Карпов, «Саха сирэ» хаһыат, edersaas.ru