Кыраныысса таһыгар тахсар пааспары оҥотторууга быйылгыттан саҥа ирдэбиллэр киирдилэр. Урут гражданин үлэтин киниискэтин куоппуйата ирдэнэр эбит буоллаҕына, билигин ол оннугар уон сыл болдьохтоох аныгы биометрическай пааспары оҥотторооччулар тарбахтарын суолларын хаалларыахтара. Биэс сыл болдьохтоох пааспары ылыан баҕалаахтар илиилэрин «киртитиэхтэрэ суоҕа».
Кыраныысса таһыгар тахсар пааспары оҥотторго хас да ньыма баар.
Бастакы ньыма: Федеральнай миграционнай сулууспа Саха сиринээҕи управлениетын куораттардааҕы, улуустардааҕы салааларыгар.
Иккис ньыма: Судаарыстыбаннай уонна муниципальнай өҥөлөр биир кэлим порталларын (gosuslugi.ru) нөҥүө.
Үһүс ньыма: Элбэх функциялаах кииҥҥэ (mzsakha.ru). Манна биэс сыл болдьохтоох пааспары оҥотторууга докумуону туталлар. Бэлэм пааспары УФС-ка биэрэллэр.
Төрдүс ньыма: УФМС-ка кэлэктиибинэн сайаапка түһэрэн, уһун уочараттан босхолонуохха сөп. Ол эрээри Докумуон ортотунан биир ый устата оҥоһуллар.
Пааспары оҥотторорго сайабылыанньа, РФ гражданинын пааспара, судаарыстыбаннай пошлина төлөбүрүн туһунан квитанция, байыаннай билиэт (18 – 27 саастаах эр дьон), 35х45 мм кээмэйдээх икки, эбэтэр түөрт хаартыска ирдэнэр.
Уон сыл болдьохтоох кыраныысса таһыгар тахсар биометрическай пааспары оҥотторуу сыаната 3500 солкуобай. 14 саастарын туола илик оҕолорго (биометрическай пааспар) 1500 солкуобай. Биэс сыл болдьохтоох пааспары оҥотторуу 2000 солкуобай. 14 саастарын туола илик оҕолорго 1000 солкуобай.