Бүгүн, ыам ыйын 23 күнүгэр Дьокуускай куорат мэра Сардаана Авксентьева ыйааҕынан, сынньалаҥ паарката арылынна.
edersaas.ru
Аттракционнар үлэлээбэттэр, атыы-эргиэн суох, маассабай спордунан дьарыктаныы көҥүллэммэт. Дьиэ кэргэнинэн, иккилии-үстүү буолан эрэ күүлэйдиэххэ, сүүрүөххэ сөп. Паарка ааныгар полицейскайдар тураллар, мааскалаах эрэ дьону киллэрэллэр.
Ол гынан баран, бу хаартыскаҕа көстөрүнэн, паарка иннинээҕи Комсомольскай болуоссакка ыһыахха курдук олус элбэх киһи, массыына мустубут. Бу курдук, көҥүллээтилэр эрэ диэн, харыстыыр миэрэлэри тутуспакка, элбэх буолан мустар, доҕоттору, аймахтары мунньан, айылҕаҕа, даачаҕа бырааһынньыктыыр, “шашлыктыыр” ыарыы тарҕанарыгар тиэрдэр. Ол ыам ыйынааҕы статистикаҕа ырылыччы көстөр.
Бүгүн, суукка иһигэр өссө 100 киһи ыарыйда, ол иһигэр 76 киһи – Дьокуускай куоракка. 66 оҕо ыалдьан инфекционнай балыыһаҕа сытар. Ыарыы тарҕанар тэтимэ түргэтээн иһэрэ бэлиэтэнэр.
Оҕолор коронавируһу чэпчэкитик аһардаллар, ол гынан баран, биллибэккэ сылдьан, ыарыыны тарҕатааччы буолуохтарын сөп. Бу күннэргэ спортивнай, оҕо былаһааккаларыгар оҕо-аймах, ыччат дьон элбэхтэр, үгүстэр мааскалара суох… Оҕолорбутун, аҕам саастаах төрөппүттэрбитин харыстаабатахпытына, ким харыстыай?
Сардаана Авксентьева бүгүн социальнай ситимҥэ бу курдук суруйбут:
— Киин куоракка ыарыы элбии турарынан, эрэсиими сымнатыы туһунан этэр табыллыбат. Маасканы кэтии булгуччулаах уонна дьонтон 1-2 миэтэрэ тэйиччи сылдьыллыахтаах. Ил Дархан ыйааҕынан уонна куораттааҕы суһал ыстаап быһаарыытынан, уопсастыбаннай тырааныспарынан пассажирадары таһыы уонна маҕаһыыннарга, оптуобустарга мааската суох дьону киллэрэр бобуллар.
Онон, мааската суох оптуобуска уонна маҕаһыыҥҥа киирэр буоллаххытына, өрөспүүбүлүкэ аҕа баһылыгын ыйааҕынан олохтоммут миэрэлэри кэһэҕит уонна 5 тыһыынча солкуобай суумаҕа ыстарааптаныаххытын сөп. Бу миэрэлэр эһиги бэйэҕит уонна атын дьон олохторугар, доруобуйаларыгар куттала суох буолууну хааччыйар миэрэ буоларын өйдүөх тустааххыт.
Манна атыыһыттар уонна оптуобус суоппардарын эппиэтинэстэрэ үрдүгүн бэлиэтиэххэ наада. Мааска эрэсиимин кэһии баарын көрдөххүтүнэ, Уокурук дьаһалтатын приемнайыгар, 31-90-90 нүөмэринэн эрийэн, биллэриххитин сөп.
Ангелина Васильева, “Саха сирэ” хаһыат, edersaas.ru