Атырдьах ыйын 17 күнүгэр Дьокуускайга Сынньалаҥ пааркатыгар дьон сарсыарда 11 чаастан күнүс 3 чааска диэри искэн ыарыыларыгар босхо бэрэбиэркэлэннилэр. Бу тэрээһин “Доруобай сайын” бырайыак чэрчитинэн ыытылынна.
Онкомаркерга хаан анаалыһын 100-тэн тахса киһи биэрдэ. Бу иннинэ бары онкотест толордулар. Бу онкоскриниг чинчийиитэ искэн ыарыыта саҥа саҕаланан эрдэҕинэ, антигеннары булар кыахтаах. Биллэрин курдук, кубулҕаттаах ыарыыны төһөнөн эрдэ булаҕын да, соччонон үтүөрэр кыах улаатар. Онон маннык тэрээһиннэр ыытыллаллара улахан суолталаах.
100-тэн тахса киһи анаалыһын лабораторияҕа ыыттылар. 10-ча күнүнэн анаалыс түмүгүн СМС нөҥүө биллэрэллэр. Онкоскрининг искэн тарҕаммыт көрүҥнэрин: тыҥа, эмиий, киэли, быар искэнин буларга көмөлөөх.
Ону тэҥэ, онкодиспансер онколог бырааһа Виктория Николаева “Эмиий искэнин сэрэтии” диэн лиэксийэни аахта. Кини дьахталлар бэйэлэрин бэрэбиэркэлэнэ сылдьалларыгар, туох анаалыһы туттаралларыгар, ханнык чинчийиини ааһалларыгар сүбэлэри биэрдэ уонна ыарыы туһунан сиһилии, хайдах сэрэтэр туһунан кэпсээтэ.
Бу тэрээһин Ийэ сылынан, “Доруобуйа” национальнай бырайыак чэрчитинэн, Өрөспүүбүлүкэтээҕи уопсастыбаннай доруобуйа уонна мэдиссиинэ профилактикатын киинин көҕүлээһининэн, доруобуйа харыстабылын министиэристибэтэ өйөөһүнүнэн ыытылынна. “Доруобай сайын” аһаҕас халлаан анныгар ыытыллар бырайыак от ыйын 4 күнүттэн саҕаламмыта, хас да тэрээһин ыытыллыбыта.
Ангелина Васильева, “Саха сирэ” хаһыат”, edersaas.ru
Хаартыска: СИА.