Сэтинньи 7 күнүгэр Булуҥ улууһун Тиксии бөһүөлэгэр тыал дизелин ситимин тутуутун бырайыагын чэрчитинэн РусГидро уонна өрөспүүбүлүкэ дьоппуон партнердарын кытта туппут тыал пааркатын үөрүүлээх арыллыыта буолуоҕа.
edersaas.ru
Тыал пааркатын састаабыгар 300 кВт кыамталаах Komaihaltec Inc дьоппуон хампаанньата туппут тыал күүһүттэн эниэргийэ хачайдыыр тэриллэр киирдилэр. Остуолба үрдүгэ — 41,5 м. иэнэ 33 м. Оборудование хотугу эргимтэ усулуобуйатыгар үлэлииргэ сөптөөх гына оҥоһулунна.
Тыал пааркатын арыллыытыгар видео-кэмпириэнсийэ быһыытынан Ил Дархан Айсен Николаев, Хабаровскайга баар Япония генеральнай консула Масанори Фукусима, РусГидро генеральнай дириэктэрэ Николай Шульгинов, саҥа энергетическэй уонна бырамыысыланнай технология сайдыытын дьоппуон NEDO тэрилтэтин толорооччу дириэктэрэ Такаси Омотэ, «Комаихалтек» хампаанньа вице-бэрисидьиэнэ Эми Комаи кыттыыны ылыахтара.
Бу тэрээһиҥҥэ Тиксиигэ тыал дизелин тутарга сөбүлэһии түһэрсиллиэҕэ. Тыал дизелин ситимэ 4600 нэһилиэнньэлээх ойуччу турар Тиксии бөһүөлэк уотунан хааччыллыытын бөҕөргөтүөҕэ, кэлии оттуктан тутулуктаах буолууну кыччатыаҕа. Арассыыйаҕа аан бастаан автоматизированнай ситимнээх биир кэлим технологическай тиһилик тыал күүһүн туһанар тэриллэри уонна дизель-генератордары туһанан, уот эниэргийэтин харыстыырга тиэрдиэҕэ.
Марианна Тыртыкова, «Саха сирэ», edersaas.ru