Үп министиэристибэтин Уһук Илиҥҥи семинара ыытылынна

Бөлөххө киир:

Бүгүн, балаҕан ыйын 16 күнүгэр, Дьокуускайга Үп министиэристибэтин Уһук Илиннээҕи семинар-мунньаҕа буолан ааста. Саха сиригэр Уһук Илин федеральнай уокуругун сэттэ эрэгийиэнин бэрэстэбиитэллэрэ кэлэн кытыннылар.

Семинарга 2022-2023 сылларга үбүлээһин, бүддьүөт сокуоннарыгар киирбит уонна киириэхтээх уларыйыылар, судаарыстыбаннай бырагыраамалар, национальнай бырайыактар тустарынан кэпсэттилэр. Санатан эттэххэ, РФ бэрэсидьиэнэ Владимир Путин кэлэр үс сыллаах бүддьүөт сокуонун барылын оҥорууга тас дойдулар киллэрбит араас хааччахтарын учуоттаан туран, дойду сайдыытыгар уларытыылары киллэрэргэ сорудахтаан турар.

Мунньахха РФ Уһук Илинин уонна Арктикатын сайдыытын миниистирин солбуйааччы Марат Шамьюнов, РФ үбүн министиэристибэтин департаменын салайааччылара Татьяна Саакян, Николай Бегчин кыттыыны ыллылар. Татьяна Васильевна бэлиэтииринэн, билигин федерация үрдүнэн бүддьүөт ылыныы сокуоннарыгар уларыйыылар киириэхтэрин наада. Ол иһигэр Бүддьүөт кодексыгар эмиэ.

“Үп-харчы, бүддьүөт сокуоннара, бары бырааптара федерация үрдүнэн үчүгэйдик олохтонон тураллар эрээри, кыратык уларытыыны киллэрэри ирдииллэр. Ол иһигэр Бүддьүөт кодексыгар, эрэгийиэннээҕи сокуоннарга тиийэ. Ону сэргэ билигин нолуок сокуоннарыгар уларыйыылар киирэ тураллар. Нолуок сулууспатын, казначейство боломуочуйаларын саҥардыы бара турар. Онон бу маннык семинардар хас биирдии эрэгийиэҥҥэ наадалар”, – диэн этэр кини.

Быйылгы семинар Саха сирин үбүн министиэристибэтэ тэриллибитэ 100 сылыгар ананна. Манна Саха сирин үлэһиттэрин таһынан Бурятия, Забайкалье, Магадан, Удмуртия, Камчатка, Чукотка, Амур уобалаһын бэрэстэбиитэллэрэ кытыннылар. Бурятия Өрөспүүбүлүкэтин үбүн миниистирэ Георгий Мадаев бу бэлиэ сылынан эҕэрдэлээн туран, Үп министиэристибэтэ бу аҥаардас биир эрэ биэдэмистибэ кэлэктиибэ буолбакка, бүтүн өрөспүүбүлүкэ үрдүнэн тарҕанан олорор, ол иһигэр оройуоннааҕы үп управлениелара, улахан систиэмэ буоларын эттэ. Онуоха бу маннык эрэгийиэн икки ардыларынааҕы семинардар ыытыллаллара исписэлиистэр уопут атастаһалларыгар төһүү буоларын бэлиэтээтэ. “Кэлиҥҥи сылларга үп систиэмэтигэр улахан уларыйыылар киирдилэр. Бүддьүөт сокуонугар, дойду да үрдүнэн буоллун, эрэгийиэннээҕи, муниципальнай да буоллун, үгүс уларыйыы киирэр. Маннык атах тэпсэн олорон кэпсэтэр хаһан баҕарар эрэгийиэннэр сайдыыларыгар, бэйэ-бэйэлэрин кытары үлэлэһиилэригэр туһалаах буолар”, – диэн этэр кини.

СӨ үбүн миниистирэ Валерий Жондоров иһитиннэрбитинэн, өрөспүүбүлүкэ кэлэр үс сыллаах бүддьүөтүн таҥыыга аан дойду үрдүнэн буола турар уларыйыылар учуоттаммыттар. “Үп министиэристибэтин сыала-соруга дьэҥкэ. Биһиги өрөспүүбүлүкэбит үбэ-харчыта, бүддьүөтэ туруктаах буолуутугар үлэлэһэбит. Бүддьүөт социальнай хайысхатын сүтэрбэт, үп сокуона судаарыстыба ылыммыт социальнай эбэһээтилистибэтин барытын толоруоҕа”, – диэн этэр кини суруналыыстары кытары көрсүһүүтүгэр. Санатан эттэххэ, бүддьүөт сокуонун барыла алтынньыга Ил Түмэн көрүүтүгэр киириэхтээх.

Аграфена КУЗЬМИНА

+1
0
+1
0
+1
0
+1
0
+1
0
+1
0
+1
0