Үп миниистирэ Валерий Жондоров Усуйаанаҕа ситэриилээх былаас үлэтин отчуоттаата
Бүгүн СӨ үбүн миниистирэ Валерий Жондоров Усуйаана улууһугар ситэриилээх былаас ааспыт сыллааҕы отчуотун иһитиннэрдэ. Кини ааспыт сылга өрөспүүбүлүкэ үрдүнэн ыытыллыбыт үлэни уонна быйылгы былааны, соругу кэпсээтэ. Отчуокка өрөспүүбүлүкэ тутаах министиэристибэлэрин, биэдэмистибэлэрин салайааччылара кытыннылар.
«Ааспыт сылга Арктика эргимтэтин сайыннарыы бырагырааматын чэрчитинэн, Усуйаана улууһугар 3 мөлүйүөн солкуобай туохтан да иҥнибэт вездеход, ону тэҥэ, 4,2 мөлүйүөн солкуобай хаарынан сылдьарга анал тиһиликтээх тиэхиньикэ атыылаһыллыбыта», — диэн Валерий Жондоров кэпсээтэ. Энэргиэтикэ өттүгэр куттал суол буолуутун хааччыйар сыалтан Саха сирин бырабыыталыстыбата уонна «РусГидро» ПАУо бииргэ үлэлээн, дизельнэй ыстаансыйалары саҥардыыга энергосерсвиснэй дуогабар быһыытынан 73 нэһилиэнньэлээх пууҥҥа анал үлэ ыытыллар эбит. Манан сибээстээн, Усуйаанаҕа дизельнэй ыстаансыйаны саҥардыыга «РусГидро» ПАУо-ны кытта бииргэ үлэлииргэ Сөбүлэһии түһэрсиллибит.
«Куонкурус түмүгүнэн, Уус Куйгаҕа, Хаһааччыйаҕа, Аллараа Дьааҥыга, Сайылыкка уонна Дьүкээгиргэ энэргиэтикэни саҥардыы быһыытынан аныгы ирдэбилгэ толору эппиэтиир установкалар туруоруллуохтара. Былаан быһыытынан бу 2023-2024 сс үлэҕэ киириэхтээх», — диэн Валерий Алексеевич иһитиннэрдэ. Санатар буоллахха, ааспыт сылга Саха сирин үрдүнэн барыта 18 хочуолунай саҥардыллыбыт. 76 км уһуннаах ититэр ситим өрөмүөннэниллибит. 1207 чааһынай дьиэ ититэр ситимҥэ холбонуллубут.
«Теплоэнергосервис» АУо 2021 сыллааҕы бырагырааматынан Усуйаанаҕа Сайылык бөһүөлэгэр чааһынай дьиэлэри холбуур үлэ ыытыллар. Ону тэҥэ, Хайыр сэлиэнньэтигэр чааһынай дьиэлэри киин ититэр ситимҥэ холбуурга аналлаах иккис түһүмэх олоххо киирэр», — диэн үп миниистирэ быһаарда.