Кыылы-сүөлү кыһыҥҥы ааҕыы түмүктэммитэ ыраатта. Бүгүн биир оннук айантан кэпсиэхпитин баҕарабыт. “Ожогино күөлэ” ресурсалаах резерват сиригэр-уотугар төһө кыыл баарын ааҕа (ЗМУ) Аллайыаха улууһун айылҕа харыстабылын иниспиэксийэтиттэн иккиэ буолан айаҥҥа туруммуттара.
Кинилэр Чокуурдаахтан Харгытыыр учаастагар диэри 250 км айаннаан тиийбиттэрэ. Онтон Полоустное диэн быраҕыллыбыт бөһүөлэгинэн айаннаан, дьэ, Ожогино күөлүгэр тиийбиттэр.
— Ожогиноҕа тиийэн, хонор сирбитин көрдөөн-көрдөөн, биир быраҕыллыбыт эргэ дьиэни булан, хомунан, оттунан хоннубут. Быйыл күөлгэ хаар халыҥа – 30-ча см, ойуурун иһигэр – 50-60 см. Биһиги сыалбыт-сорукпут төһө кыыл суола баарын ааҕыы этэ. Быйыл, хата, тайах суола элбээбит. Тыатын иһигэр сиэгэн син баар. Киис уонна кырса суолларын көрдүбүт. Биһиги дьолбутугар, хата, күн-дьыл туруга наһаа үчүгэй этэ. Онон улаханнык тоҥмокко сырыттыбыт, — диэн кэпсээтэ ол айан туһунан кыһыҥҥы ааҕыы үлэтигэр кыттыбыт Иван Рожин.
Бэлэмнээтэ Женни Стрюкова
Хаартыска: И.Рожин ыытта