Бэҕэһээ Чокуурдаахха экология үлэһиттэрэ овцебык оҕотун булан аҕалбыттар диэн суруйбуппут.
Табылыннаҕына, овцебык оҕотун субуотаҕа “Орто дойду” зоопаркаҕа «таһаҕас курдук» туттаран, ыытыахтаахтар. Бөөлүүн овцебык хайдах хонон турбутун, тугу аһыырын олохтоох иниспиэксийэ судаарыстыбаннай иниспиэктэрэ Семен Павловтан туоһуластыбыт.
— Бэҕэһээ хонтуораҕа аҕалан бараммыт, “Орто дойду” зоопаркаҕа эрийэн, тугунан аһатабыт диэн сүбэлэппиппит. Онуоха оҕо иһэр үүтүн иһэрдиҥ, быыһыгар уута биэриҥ диэн эппиттэрэ. Үс чаас буола-буола аһатыахтаахпыт. Онон овцебыгы дьиэбэр хонноро илдьибитим. Түүн аһаан баран, утуйан буккураан хаалбыта. Арааһа, бураанынан айаннаан уонна туундараҕа соҕотох сылдьан сылайбыт быһыылаах. Сарсыарда 5 чаас саҕана уһуктан, ньирэй курдук мэҥирээбитэ. Онно туран аһаппытым. Уонна эмиэ утуйан хаалбыта. Чокуурдаах маҕаһыыныгар “Нестожен” эрэ үүт баар, ону иһэрдэбит, — диэн кэпсээтэ иниспиэктэр.
Бэлэмнээтэ Женни Стрюкова
Хаартыска: улуустааҕы экология иниспиэксийэтэ ыытта