Бүгүн СӨ Судаарыстыбаннай Мунньаҕа (Ил Түмэн) “Сүөһү уонна сылгы кыстыгын хаамыытын, айылҕа иэдээниттэн уонна баһаартан эмсэҕэлээбит тыа хаһаайыстыбатын табаары оҥорооччуларыгар көмөнү оҥорууга миэрэлэри олоххо киллэрии туһунан” бырабыыталыстыба чааһын ыытта. Кэпсэтиини өрөспүүбүлүкэ ил Түмэнин тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Андрей Находкин иилээтэ.
Өрөспүүбүлүкэ тыа хаһаайыстыбатын миниистирэ Александр Атласов хоту сылдьарынан, дакылааты миниистири солбуйааччы Николай Афанасьев туруорда. Миниистири солбуйааччы этэринэн, бу сыл кулун тутар 03 күнүнээҕи туругунан бары хаһаайыстыбаларга 185 505 төбө ынах сүөһү, ол иһигэр 77567 ынах иитиллэн турар. Уопсайа 10836 ынах төрөөбүт. Бары көрүҥнээх хаһаайыстыбаларга 182153 сылгы баар. Итинтэн 59495 сылгы эбии аһылыкка киирбит. Холобура, саамай элбэх сылгы эбии аһылыкка киириитэ Горнай улууһугар (3720), Өлүөхүмэҕэ (4494) бэлиэтэммит.
Николай Степанович бэлиэтииринэн, маныаха бу ааспыт кураан сайын уонна ойуур уота сабыдыаллаабыт.
Николай Афанасьев отчуотугар кыстык бүтэрэ 89 хонук хаалбытын ахтан туран, 182,5 тыһ. туонна от, 4,2 тыһ. т сенаж, 7,9 тыһ. т сиилэс хаалбытын эттэ.
Сыыппара сыыппаранан, ол эрээри норуот дьокутааттара кыстык этэҥҥэ ааһыытыгар от соҕотуопката улахан оруоллааҕын бэлиэтээтилэр. Билигин оту тиэйиигэ Уус Алдан улууһугар балаһыанньа ыгым эбит. Атын да улуустарга оту тиэйиигэ массыыната тиийбэтэ атахтаабыт. Ил Түмэн бэрэссэдээтэлин бастакы солбуйааччы Александр Жирков үгүс хаһаайыстыбалар массыына үрдүттэн олороллорунан тиэйиигэ тарыыбы көтөҕүөххэ, тиэйии схематын уларытыахха диэн этии киллэрдэ.
Дойдуга тас дойдулар киллэрэн эрэр хааччахтааһыннарыгар бэлэм буолар курдук, олохтоох бэйэ аһынан хааччынар туһуттан аны сайын оттооһуну өрөспүүбүлүкэ иһигэр ыытан, үрэх сирдэри хаалларбакка оттуохха диэн уопсай санааҕа кэллилэр.
Бырабыыталыстыба чааһыгар кыттыбыт, тыа хаһаайыстыбатын салаатын сүрүннээччи, СӨ Бырабыыталыстыбатын бэрэссэдээтэлин солбуйааччы Михаил Никифоров тэрийэр үлэни күүһүрдэргэ эттэ. Туох-ханнык иннинэ от тиийбэт улуустарыгар миэстэтигэр ревизияны ыытан чопчулуурга сүбэлээтэ.
Андрей Находкин СӨ Ил Дархана А.Николаев, СӨ Ил Түмэн бэрэссэдээтэлэ А.Еремеев тыа хаһаайыстыбата сайдыытын өйүүллэрин, онуоха үгүөрү үп (12,5 млрд тахса солк.) көрүллүбүт үн бэлиэтээн туран, бу үп тыа хаһаайыстыбата сайдыытыгар дьиҥнээхтик көмө буоларын курдук туһаныллыахтааҕын санатта.
Миниистири солбуйааччы Николай Афанасьевка үгүс ыйытыылары норуот дьокутааттара биэрдилэр. (Бырабыыталыстыба чааһын туһунан сиһилии кэлэр нэдиэлэҕэ “Тыа сирэ” балаһаҕа тахсыаҕа).
Бэлэмнээтэ Женни Стрюкова.
Хаартыска: ТХМ саайтыттан.