Оттуур ходуһалары сөргүтүөххэ

Ааптар: 
Бөлөххө киир:

Тыа сирин уонна тыа хаһаайыстыбатын сайдыытыгар Чурапчы улууһа өрүү инники күөҥҥэ иһэр уонна саҥаны олоххо киллэрээччинэн буолар. Ол иһин Чурапчы улууһугар тыа хаһаайыстыбатын салгыы инники сайдыытын, үүт аһылыгы оҥорон таһаарыыга, Таатта, Уус Алдан, Чурапчы улуустарыгар оттуур ходуһалары көрүүгэ-истиигэ уонна туһаныыга анаммыт стратегическай сессия буолан ааста.

Сессияҕа илин эҥээр биэс улууһун баһылыктара, министиэристибэлэр, департаменнар бэрэстэбиитэллэрэ, тыа хаһаайыстыбатын тэрилтэлэрин,хаһаайыстыбаларын баһылыктара кытыннылар.  

Сессия кэмигэр Бырабыыталыстыба Бэрэссэдээтэлин солбуйааччы Михаил Никифоров улуус баһылыга Степан Саргыдаевы кытта Үрүҥ Күөл сэлиэнньэтигэр  тыа сирин сайдыытын киинигэр, Үрүҥ Күөл, Дириҥ, Дьабыла сэлиэнньэлэригэр оттуур ходуһалар үүнүүлэрин, оттооһуну көрдүлэр. “Чурапчы кэпэрэтиип бэтэринээринэй-чинчийэр лабораториятыгар, халбаһыыны уонна үүт бородууксуйатын оҥоруу сыаҕын үлэтин билистилэр.

Сессия үлэтин туһунан дьон санаатын билсиҥ:

Галина Осипова, СӨ Тыа хаһаайыстыбатын министиэристибэтин Сүөһүнү иитиигэ, племенной дьыалаҕа, кэпэрээссийэҕэ уонна хаһаайыннааһын дьоҕус көрүҥнэригэр департаменын салайааччытын солбуйааччы, биология наукатын хандьыдаата:

Саҥа хайысхалаах стратегическай сессия олус тэрээһиннээхтик ааста. Санаа атастаһыыта, саҥа идиэйэлэри ылыы буолла. Бу сүүрээни салгыы сайыннарыахха диэтилэр. Өрөспүүбүлүкэ Бырабыыталыстыбатыгар тыахаһаайыстыбатын сытыы, кыһалҕалаах боппуруостарын туруорсарга маннык сессия көмөлөөх буолсу диэн санааҕа кэллилэр кыттааччылар. Үс сүрүн боппуруос тула кэпсэттибит. Ону сэргэ тыа хаһаайыстыбатын исписэлиистэрин үлэлэрин тиһигин уларытыахха диэтилэр. Мин оттуур ходуһалары сөргүтүүнү тэрийиигэ анаммыт бөлөх үлэтин салайдым. Бу боппуруоска кыттааччылар нэһилиэктэр, улуустар таһымнарынан урукку курдук МТС-тар курдук тэрилтэни тэрийиэххэ диэн этии киллэрдилэр. Биллэрин курдук, билигин оттуур ходуһалар 48 бырыһыаннара эрэ туһанылла сылдьар. Онтон ордуга барыта талаҕынан эҥин бүрүллэн турар. Онон сүөһү аһылыгын баазатын тупсарар туһуттан быраҕыллыбыт сирдэри сөргүтүөххэ диэтилэр. Чурапчылар анал бырагыраама оҥорбуттар. Оттуур сири үчүгэйдик оҥордохпутуна, өрөспүүбүлүкэ таһыттан оту тиэйэн, улахан ороскуоту көрсүө суоҕа этибит диэн санааҕа кыттааччылар кэллилэр. Уонна сессия кэмигэр тыа хаһаайыстыбатын исписэлиистэрэ – зоотиэхиньиктэр, агрономнар тиийбэттэрин туһунан этилиннэ. Тэрээһини тыа хаһаайыстыбатын миниистирин бастакы солбуйааччы Петр Попов иилээн-саҕалаан ыытта. Сессия үлэтин түмүктүүргэ Бырабыыталыстыба  Бэрэссэдээтэлин солбуйааччы Михаил Никифоров  түмүк тылы эттэ. Сессияҕа кирбит этиилэри чопчулаан, СӨ Бырабыыталыстыбатыгар киллэриллиэҕэ.

Анна Флегонтова, Чурапчы улууһун Болугур нэһилиэгин баһылыга:

— Олус туһалаах сессия буолла. Тыа хаһаайыстыбатыгар уларытыы таһаарыахха диэн санааттан тэриллибит сессия быһыылаах. Кырдьык, тыа сиригэр кыһалҕа элбэх. Ол курдук, сүөһүбүт ахсаана аччыыр кутталлаах, сүөһү ыарыыта элбээтэ, үүт харчыта үрдүөн наада. Дьон санаатын аһаҕастык эттэ. “Төгүрүк остуол” көрүҥүнэн ыытылынна.  

Бэлэмнээтэ Женни Стрюкова

Хаартыска: СИА

+1
0
+1
0
+1
0
+1
0
+1
0
+1
0
+1
0