Уопсастыба

Илин эҥэргэ оттук сезона саҕаланна

Бэҕэһээ, балаҕан ыйын 6 күнүгэр, «СӨ ОДьКХ» ГУП Тааттатааҕы уонна Чурапчытааҕы филиаллара итиини туһанааччыларга биэриини саҕалаабыттар. Ону тэҥэ оттук сезона Томпо улууһугар — Хандыга, Дьабарыкы Хайа, Теплай Ключ, Тополинай, Кэскил уонна Мэҥэ Алдан сэлиэнньэлэригэр саҕаланна. edersaas.ru

«Кыстыкка бэлэмнэнии чэрчитинэн Таатта филиалын үлэһиттэрэ 5 хочуолунайы, 16 носуос уонна үрдэрэр тэриллэри саҥалыы уларыттылар, 3,4 км теплотрассаны уонна 175 м уу ситимин саҥардан тартылар. Барыта 33 хочуолунай, 15,2 км сылаас уонна 17,1 км уу ситимнэрэ үлэҕэ бэлэмнэр. Учаастактарга хочуолунай уматыгын саппааһа толору баар,» — диэн тэрилтэ пресс-сулууспата иһитиннэрдэ.

Бүгүн былаан быһыытынан, Амма, Уус Алдан, Бүлүү, Сунтаар уонна Хаҥалас филиаллара оттук сезонугар киирилэрэ күүтүллэр.

Егор Карпов, «Саха сирэ» хаһыат, edersaas.ru

0
0

Добавить комментарий