От ыйын 2 күнүгэр Бырабыыталыстыба Бэрэссэдээтэлин солбуйаачы Михаил Никифоровка оттооһун туһунан мунньах ыытылынна.
Вице-премьер быйыл кураан сайын кэлбитин, салгын ыйдааҕы орто температурата нуорматтан үрдүгүн, ити оттооһуҥҥа уустуктары үөскэтэрин бэлиэтээтэ. Онон кыстыгы төһө оттоох көрсөрбүт миэстэҕэ тэрээһинтэн тутулуктааҕын ыйда.
Оттооһуҥҥа бэлэмнэнии туһунан сүрүн иһитиннэриини тыа хаһаайыстыбатын миниистирин солбуйааччы Николай Афанасьев оҥордо. Былыырын киин уонна илин эҥээр улуустарга кураан, Бүлүү эҥээргэ ардахтаах сайын буолбутун үрдүнэн, кыстыыр от хааччыллыбытын, кэккэ улуустар саппааска оттообуттарын санатта. Быйылгы былааны билиһиннэрдэ. Курааннаабыт улуустарга «Россельхозкиин» ФСБТ исписэлиистэрэ 19 972 гектар ходуһаны чинчийбиттэр, онтон 19 429 га (97 %-а) аһыҥалааҕа биллибит (1 кв. м сиргэ ортотунан 7,1 экз.), ордук элбэх аһыҥа Уус Алдан улууһун Хоро нэһилиэгэр түспүтэ быһаарыллыбыт (1 кв. м сиргэ 53,7 экз.). Улуустар бэрэстэбиитэллэрэ быһа сибээскэ тахсан, былааннарын, үүнүү хайдаҕын, кэпсээтилэр.
Мунньаҕы түмүктүүрүгэр Михаил Никифоров улуустарга үксүлэригэр хартыына тэҥ соҕуһун, былаан толоруллубат туруктааҕын эттэ. Онон бары күүһү түмэн, оттооһуҥҥа тэрээһиннээхтик турунар соругу туруорда. Улуустар баһылыктарын туруорсууларынан ардаҕы искусственнайдык түһэриигэ зондировщик-сөмөлүөт (Ан-26 «Циклон») Бүлүү улуустарыгар сылдьарын, киин улуустарга эмиэ маннык үлэ тэриллиэҕин иһитиннэрдэ.
Мобильнай биригээдэни тэрийэн ыраах учаастактарынан уонна атын улуустартан ходуһа түүлэһэн көһөн оттооһуну саҕалыырга сорудахтаата. Хас мобильнай биригээдэ тэриллэрин, олор төһө ыраах сиргэ баран оттуулларын туһунан, төһө туонна оту оттуурга былааннаналларын ыйан туран, сайаапкалары бу нэдиэлэ устатыгар түһэрэргэ сорудахтаата. Оттон үчүгэй үүнүүлээх улуустар даһалталарыгар саппааска оттооһуну тэрийэргэ эттэ. Оту тиэйиигэ быйылгы бүддьүөккэ харчы көрүллүбэтэҕэ, онон былырыыҥҥы курдук, оту тиэйии-таһыы ороскуота кэлэр сылга төлөнүөҕэ диэтэ.
Раиса Сибирякова, «Саха сирэ», edersaas.ru