Сунтаар улууһугар былырыын бэс ыйыгар ардах түспэккэ, ходуһалар таас сирдэрэ курааннаан, аһыҥаҕа ылларбыта.
edersaas.ru
Быйыл атын хартыына — бэс ыйыгар сөбүгэр ардаан, от балачча үүннэ. Ордук уһаайба үүнүүтэ үчүгэй, 25 суотай уһаайбалаах ыаллар туонналыы оту кэбистилэр. Окко маассабайдык киирии Бөтүрүөп ардаҕын уонна «абааһы мунньаҕын» кэнниттэн саҕаланар эрээри, Бордоҥ ыаллара от ыйын саҥатыттан хотуурдарын тыаһатан, бастакы кураан күннэри баттаһа оттууллар.
Максимовтар өссө Бөтүрүөп иннинэ отторун кэбиһэр үгэстээхтэр. Ыал аҕа баһылыга 34 саастаах Сергей Максимов икки үөр сылгылаах, сылгы базалаах. Сылгыларыгар сыл ахсын уонча туонна оту хааччынар. Былырыын тоҕус туоннаны от ыйын 12 күнүн иннинэ кэбиспит. Быйыл ходуһатын от ыйын 8 күнүттэн саҕалаан охсубут. Бастаан бөһүөлэктэн үс килэмиэтир тэйиччи сытар Тойон Уйалааҕын тыраахтарынан биир күн оҕустарбыт. Сарсыҥҥытыгар 12 килэмиэтирдээх сиргэ баар ходуһатын, Сиикэлдьини, бүтэрбит. Икки хонугунан Максимовтар бары мустаннар, аҕалара Алексей, убайа Андрей уонна икки көмөлөһөөччү буоланнар, отторун мунньан, бугуллаабыттар. Сарсыныгар кэбиһиэхтээхтэрин ол киэһэ ардах түһэн кэбиһэн, кураан күнү күүтэр буолбуттар. Быйыл алта от кэлэрэ буолуо, ходуһам үс гыммыт иккитин эрэ оттуубун, сороҕун сылгыларым кыһыҥы хаһыыларыгар хаалларабын диир Сергей.
Кини 2011 сылтан Накыымҥа “БелАЗ” көлөҕө суоппардыыр. Ол иһин отун эрдэ дьаһайан баран, баахтанан үлэлии барар үгэстээх. Ыал буолбута ырааппыт. Бастакы оҕото Айтал номнуо онус кылаас. Сайын аайы ходуһа хоһууна: охсор, мунньар, кэбиһэр. Кыыһа Алена бэһискэ үөрэнэр. Эдэр ыал “Успех” диэн маҕаһыыннаахтар, онно билигин Аленалара атыыһыттыыр. Түөрт саастаах Андриан диэн кыра киһи дьонун батыһа сылдьар. Ыал ийэтэ Елена омук тылын учуутала, мунньууга көмөлөһөр.
Люба Антипина салайар бааһынай хаһаайыстыбата ходуһаҕа от ыйын 8 күнүттэн киирбитэ. Үс гектардаах сири оҕустаран, бугуллаан, субу кэбиһэр былааннааҕын Бөтүрүөп ардаҕа мэһэйдээтэ.
—Мин Бордоҥҥо икки ходуһалаахпын. Сыл аайы окко эмиэ эрдэ киирэбин. Бастаан чугас баар Элгээммин оттуубун. Быйыл мотуордаах хотуурунан от ыйын 5 күнүттэн саҕалаан, бэҕэһээ охсон бүтэрдим. Эрдэ охсубут оппун эккэ кэпсэппит ыалбар Любалаахха тиэйбиппит.
Виссарион Данилов, Владимир Лукин чугастааҕы ходуһаларын бүтэрэн эрэллэр. Салгыы Бүгүйэххэ оттуу барыахтаахтар. Бордоҥ нэһилиэгин отчуттара окко маассабайдык киирдилэр.
Сунтаартан Борис Потапов, «Саха сирэ» хаһыат, edersaas.ru сайтка анаан