Бас билии көрүҥүттэн тутулуга суох өрөспүүбүлүкэ үрдүнэн быйыл 484 тыһ. 972 т от, 18 тыһ. 902 т сиилэс уонна 11 тыһ 850 т сенаж бэлэмнэниэхтээх.
edersaas.ru
Тыа хаһаайыстыбатын министиэристибэтэ иһитиннэрэринэн, от ыйын 15 күнүнээҕи туругунан, өрөспүүбүлүкэ үрдүнэн 8 тыһ. 162 киһи, 2 тыһ. 635 араас мааркалаах тиэхиньикэ, 2 тыһ. 757 звено (405 толору мэхэньисээссийэлээх, 1 тыһ. 243 толорута суох мэхэньисээссийэлээх, 88 көлө-илии, 1 тыһ. 101 илии звенолара) күөх быйаҥ күрэҕэр сылдьаллар. Барыта 11 тыһ. 874 гектар иэннээх ходуһа сирэ охсулунна, бааһынаҕа ыһыллыбыт сүөһү аһылыгын кытары холбоон 3 тыһ. 855 туонна от кэбиһилиннэ.
Кураантан өрүсүһэн илин эҥээр уонна сорох киин улуустар хотуурдарын эрдэ тыаһаппыттара. Онон, билигин Нам дьоно 543, Уус Алдан отчуттара 442, Хаҥалас хаһаайыстыбалара 397, Мэҥэ Хаҥалас биригээдэлэрэ 283, Чурапчы хотуурадахтара 255 туонна оту чөкөттүлэр. Бүлүү эҥээр да улуустар окко киириини саҕалаатылар, сунтаардар 331, бүлүүлэр 293, ньурбалар 179, үөһээ бүлүүлэр 122, туонна кэбиһиилээхтэр. Өрөспүүбүлүкэ саппаас отун соҕотуопкалыыр Кэбээйи хоһууннара 199 туоннаны оттоотулар. Хотулар даҕаны саҕалааһыннара куһаҕана суох: орто халымалар 96, томполор 65, муомалар 77, абыйдар 23, үөһээ халымалар 12 туоннаны чөкөттүлэр.
“Сайыҥҥы биир күн – дьылы аһатар” диэн мээнэҕэ этиллибэт. Хас биирдии чаас былдьаһык. Күнү-дьылы өрүсүһэн, хаһаайыстыбалар күөх быйаҥ күрэҕэр туруннулар.
Раиса Сибирякова, «Саха сирэ» хаһыат, edersaas.ru