Сэтинньи 26-29 күннэригэр өрөспүүбүлүкэ оториноларингологиятын сулууспата тэриллибитэ 70 сылыгар аналлаах тэрээһиннэр ыытылыннылар.
Медицина национальнай киинин сурдологиятын отделениетыгар кохлеарнай иплантаннар систиэмэлэрин туруорарга анал сеанстар ыытылыннылар. Оттон Өрөспүүбүлүкэтээҕи 2 №-дээх балыыһаҕа-Суһал медицинскэй көмө киинигэр “Ринохирургияҕа үрдүк технологиялар” маастар-кылаас чэрчитинэн, оҥоһулла турар эпэрээссийэни онлайн-эрэсиимҥэ көрдөрдүлэр.
Тэрээһиннэр сэтинньи 29 күнүгэр оториноларингологияҕа ситиһиллибит үрдүк технологияларга аналлаах научнай-практическай кэмпириэнсийэнэн, Москваттан кэлбит учуонайдар, исписэлиистэр иһитиннэриилэринэн түмүктэннилэр.
Устуоруйаны кыратык аҕыннахха, Аҕа дойду Улуу сэриитин содулларын оһорунар кэмҥэ, 1949 сыллаахха өрөспүүбүлүкэтээҕи балыыһа хирургиятын иккис отделениетыгар лор ыарыыларын эмтииргэ 10 куойка көрүллэн, ыарыһахтар балыыһаҕа сытан эмтэнэр кыахтаммыттара. Оттон уон сылынан аһыллыбыт анал лор-отделениетыгар сэбиэдиссэйинэн САССР үтүөлээх бырааһа Стефания Круль анаммыта.
Өрөспүүбүлүкэтээҕи 2 №-дээх балыыһа оториноларингологияҕа отделениетын сэбиэдиссэйэ Иннокентий Александров иһитиннэрбитинэн, отделение билигин 30 куойкалаах. Манна сүрүннээн мурун, куолай, бэлэс, мурун, эчэйии уонна искэн ыарыыларын эмтииллэр. Аҕыс быраас үлэлиир. Күн аайы бэнидиэнньиктэн бээтинсэҕэ диэри 5-8 эпэрээссийэ оҥоһулларын сэргэ, суһал эпэрээссийэҕэ наадыйааччылар баар буолуохтарын сөп. Ону тэҥэ быраастар атын балыыһалар, поликлиникалар ыыппыт ыарыһахтарын көрөллөр, өрөспүүбүлүкэ улуустарыгар санавиациянан суһал көмөҕө тиийэллэр.
Оториноларингология отделениета үрдүк ньыманан оҥоһуллар эпэрээссийэлэр бырагыраамаларыгар киирсэн, кулгаахха реконструктивнай эпэрээссийэлэр оҥоһуллаллар, кулгаах сарыытын чөлүгэр түһэрэллэр, имплантаннары туруораллар уо.д.а. оҥоһуллар. Сулууспа исписэлиистэрэ кулгаахтарынан истибэт дьоҥҥо кохлеарнай имплантацияҕа алта эпэрээссийэни оҥордулар. Соторутааҕыта дьарҕарбыт дакриоциститка оҥоһуллар эпэрээссийэ ньыматын баһылаатылар.
Инники кирбиигэ сылдьарга, биллэн турар, аныгы күүстээх тэриллэринэн хааччыллыы ирдэнэр. Исписэлиистэр маны таһынан иккис отделение аһыллан, ноҕурууска арыый кыччыан уонна доруобай күрэстэһии баар буолуон баҕараллар.
Надежда ЕГОРОВА, “Саха сирэ” хаһыат, edersaas.ru
Хаартыскалар Өрөспүүбүлүкэтээҕи 2 №-дээх балыыһа архыыбыттан ылылыннылар.