Бэҕэһээ, от ыйын 14 күнүгэр, вице-премьер Михаил Никифоров куйаар ситиминэн улуус баһылыктара кыттыылаах эбии аһылыгы бэлэмнээһиҥҥэ туһуламмыт мунньаҕы ыытта.
Бүгүҥҥү күҥҥэ окко 966 звено, ол иһигэр 185 механизированнай, 233 механизированнай аҥардаах, 6 атынан үлэ, 531 илиинэн үлэлиир биригээдэ таҕыста. Оттооһуҥҥа 807 тыраахтар, 2111 киһи хабылынна. Бэҕэһээҥҥи туругунан 3104 га сир охсулунна, 872 туонна от бэлэмнэннэ.
Өрөспүүбүлүкэҕэ быйылгы от былаана — 443 881 туонна. Бу 12%-нынан былырыыҥҥытааҕы былаантан элбэх. Өссе 30,1 тыһыынча туонна сиилэһи, 12,9 тыһыынча туонна сенаһы оттуур сорук турар. Михаил Никифоров от үүнүүтэ үчүгэйин бэлиэтээн туран, айылҕа иэдээни аҕалыан сөбүн бэлиэтээтэ. Ол курдук, Дьааҥы, Кэбээйи уонна Горнай улуустарыгар оттуур ходуһалар ууга баран, уустук балаһыанньа үөскээбитин, оттон Чурапчыга курааннаан, бу улууска от былаана 72% эрэ туолуон сөбүн ыйда.
Өрөспүүбүлүкэ киин, илин уонна Бүлүү умнаһын улуустарыгар, ордук Ньурбаҕа уонна Сунтаарга, аһыҥа 850 гектар сири сиэтэ. Вице-премьер Кэбээйи, Чурапчы, Таатта уонна Горнай улуустарын бэрэстэбииитэллэрин отчуоттарын иһиттэ.
— Бэйэҕит кыаххытын муҥутуурдук туһанан үлэлээҥ. Сонун сүүрээннэри тобулан, уустук балаһыанньаттан тахсар өрүттэри толкуйдааҥ. Иннибитигэр — күүрээннээх үлэ икки ыйа. Тыа сирин сайдыытын судаарыстыбаннай бырагырааматын 72% толордубут. Үбүлээһин көрүллүбүтэ. Онон үлэ сөптөөх хаамыытыгар эһиэхэ тустаах усулуобуйа тэриллибитэ. Ситиһиилээх, тахсыылаах үлэни баҕарабын! — диэн вице-премьер улуус баһылыктарын кытта оттооһуҥҥа анаммыт мунньаҕын түмүктүүрүгэр анаан бэлиэтээтэ.
Елена ПОТОЦКАЯ, «Саха сирэ» хаһыат.