«Открытие» баан Саха сиринээҕи отделениетын салайааччыта Максим Федоров бүгүн «Сахамедиа» пресс-кииҥҥэ суруналыыстары кытта көрүстэ.
Баан управляющайа 2020 сыллааҕы үлэтин түмүгүн ырытта, быйылгы былаанын сырдатта. Ааспыт сыл түмүгүнэн Саха сиригэр үлэлиир “Открытие” баан кирэдьиит бартыбыалыгар 3 млрд солк. киллэрбит. Ол курдук, бөдөҥ биисинэс + 84%, аччыгый уонна орто биисинэс + 80% укпуттар. Баан корпоративнай, инвестиционнай, розничнай, МСБ уонна Private Banking хайысхаларынан үлэлиир.
Управляющай Максим Федоров бэлиэтииринэн, “Открытие” баан олунньу 3 күнүгэр Саха сиригэр сылы эргиччи үлэлиир “Хотугу сулус” Оҕо сынньанар киинин тэрийиигэ үбүлээһини оҥорорун туһунан дуогабар түһэристэ. Үбүлээһини оҥорор үлэни ВЭБ.РФ уонна ГЧП Национальнай Киинэ эрэгийиэннэргэ кириисиһи бохсуу бырагырааматын чэрчитинэн ыыттылар. Кирэдьииттээһин сөбүлэҥэ “Хотугу сулус” ХЭУо уонна «Открытие» бааны кытта түһэрсилиннэ. Маны таһынан, өрөспүүбүлүкэ, Оҕо киинэ уонна баан эмиэ сөбүлэҥ түһэристилэр.
— Оҕо киинэ 5 тыһыынчаттан тахса оҕо сынньалаҥын тэрийиэҕэ. Оҕолор тиэхиньиичэскэй үөрэхтээһини, мобильнай сыһыарыылары оҥорууну уонна 3D бэчээти оҥорууга дьарыктаныахтара. – диэн бэлиэтээтэ Максим Федоров.
Бырайыак сыаната — 1,86 млрд. Онтон 1,46 млрд солкуобайын «Открытие» баан уйунуоҕа.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа: Денис Попов түһэриитэ.