Тыа хаһаайыстыбатын миниистирэ Александр Атласов ситэриилээх былаас отчуотун кэмигэр мунньахтан быыс булан, Чурапчы улууһун хаһаайыстыбаларыгар сырытта.
edersaas.ru
Ол курдук, Мындаҕаайыга “Мындаҕаайы” кэпэрэтиип итиэннэ иккис сылын хортуоппуйга үлэлиир Данил Павлов үлэлэрин-хамнастарын, инники былааннарын билистэ. Кэпэрэтиип сүөһү иитэр комплексыгар 370 сүөһүнү, ол иһигэр 185 ыанар ынаҕы кыстатан турар. Ааспыт сайын оту таһынан 1 тыһ. 700 туонна сиилэһи, 500 туонна сенаһы бэлэмнээбит буолан, сүөһүлэр туруктара үчүгэй. Хайы-сах 50-тан тахса ынах төрөөбүт.
Оскуолаҕа үлэлии сылдьан, сиргэ идэтийэн үлэлииргэ быһаарыммыт Данил Павлов былаанын толорон, 25 гектар сиртэн 278 туонна үүнүүнү ылбыт, туттар тэрили атыылаһар уустуктардааҕынан сибээстээн, хортуоппуйу ыраастыыр уонна суортуур тэрили бэйэлэрэ оҥорон, үлэлэрин чэпчэппиттэр. Миниистир салгыы Үлэ Дьоруойа Р.И. Константинов аатын сүгэр аграрнай хайысхалаах орто оскуолаҕа сылдьан кэлэктииби кытары көрүстэ, тутулла турар сыыр оҥорор сыахха сырытта.
Одьулуун нэһилиэгин дьаһалтата, аграрнай техникум, агро-оскуола иитэр-үөрэтэр кэлэктииптэрэ итиэннэ нэһилиэнньэ биир санааҕа кэлэн, ситимнээх үөрэх ньыматынан «Үөрэҕирии агрокластерын» бырайыагын оҥорбуттар. Кэлэр өттүгэр бу бырайыак улууска баар аграрнай хайысхалаах оскуолалары түмэр, сайыннарар киин буоларын таһынан, илин эҥэр улуустарга агро-хайысхалаах үөрэх ситимэ сайдарыгар бөҕө тирэх буолар кыахтаах эбит. Билигин агро-оскуола үөрэнээччилэрэ, техникум устудьуоннара «Комплекс» бааһынай хаһаайыстыбаны кытары ыкса сибээһи туталлар, сүөһү иитиитин төрүттэрин хаһаайыстыба сүөһүнү иитэр комплексыгар үөрэтэллэрэ атыттарга холобур буолуон сөп.
Надежда БОРИСОВА, «Саха сирэ» хаһыат, edersaas.ru. сайтка анаан