От ыйын бүтүүтэ Аллараа Бэстээхтэн тимир суолунан айан-сырыы саҕаланыаҕа

Бэс ыйын 19 күнүгэр СӨ Тырааныспарын уонна суол хаһаайыстыбатын министиэристибэтин анал хамыыһыйатын үлэтин түмүгүнэн, Томмот – Дьокуускай (Аллараа Бэстээх) хайысхатынан айан-сырыы  бэлэмин туһунан докумуоҥҥа илии баттанна. Аны билигин Арассыыйа тимир суолларын бирикээһин кэтэһэбит.

edersaas.ru

Арассыыйа тимир суолларын Уһук Илиннээҕи территориальнай управлениетын салайааччытын солбуйааччы Антон Малышев салайааччылаах тутар хамыыһыйа Дьокуускай куоракка бэс ыйын 18 күнүгэр үлэлээтэ.  Томмот – Дьокуускай (Аллараа Бэстээх) хайысхатынан оробуочай пуойаһынан айаннааннар, миэстэтигэр путевой хаһаайыстыбаны көрдүлэр-иһиттилэр.

« Туох-баар докумуоннары барытын бигэргэтэн баран, от ыйын 27 күнүгэр пассажирдары таһыыны саҕалыыр сыаллаахпыт-соруктаахпыт. Билигин үлэ былаан быһыытынан бара турар. Тутуу үлэтэ түмүктэнэн, докумуонунан бигэргэтии соруга турар”, — диэн “Единая группа заказчика” ФГУП дириэктэрэ  Олег Туманян иһитиннэрдэ.

Онон, докумуон силигэ ситтэҕинэ, бастакы пассажирдар Аллараа Бэстээх вокзалыттан от ыйын 27 күнүттэн айаҥҥа турунуохтарын сөп.

edersaas.ru