Саха сиригэр кыстыкка бэлэмнэнэн, сүөһү аһылыгын бэлэмнээһин үлэтигэр уопсайа 23 163 киһи, 9 460 тыраахтар үлэлиир.
Тыа хаһаайыстыбатын министиэристибэтэ иһитиннэрбитинэн, быһа барыллаан ааҕан-суоттаан көрүүнэн, хороҕор муостаах уонна сылгы 2023 сыл тохсунньу 1 күнүгэр 192,2 тыһ. төбө буолуон сөп. Итини учуоттаан туран, 2022 с. сүөһү аһылыгын бэлэмнээһин былаана 443 881 туонна. Бу ааспыт сылы кытары тэҥнээтэххэ 12% улахан диэн СИА суруллар.
От ыйын 25 күнүнээҕи иһитиннэриинэн, 73 996 га сир охсуллубут, 45 812 туонна от бэлэмнэниллибит. Барыта 7 351 мобильнай биригээдэ үлэлиир, ол иһигэр 1 925 механизированнай, 4 123 полумеханизированнай, 177 атынан уонна илиинэн, 1 126 илиинэн оттууллар.
Күн-дьыл туруга мөлтөҕүттэн, окко Дьааҥы, Кэбээйи, Горнай, Чурапчы улуустара уустук балаһыанньалаахтар диэн тыа хаһаайыстыбатын министиэристибэтиттэн иһитиннэрэллэр.
Бүлүүгэ, Үөһээ Бүлүүгэ, Горнайга оттуур сирдэр уонна онно барар суол-иис уһун ардахтартан ууга барбыттар. Бүлүүгэ уонна Үөһээ Бүлүүгэ ууну түһэриигэ үлэ ыытыллар. Маны таһынан, Дьааҥы оройуонугар элбэх оттуур сирдэр ууга сыталлар. Онон ууга баран эмсэҕэлээбиттэргэ аҕыс туонна комбикорм илдьибиттэр, чөлүгэр түһэрии үлэлэрэ ыытыллаллар.
Оттон 13 улууска, киин, өрүс уҥуордааҕы, бүлүү бөлөх оройуоннарга 850 га иэннээх сиринэн аһыҥа ыспыт. Элбэх аһыҥа Сунтаар, Ньурба, Таатта, Чурапчы, Уус Алдан оройуоннарыгар бэлиэтэнэр.
СӨ Тыа хаһаайыстыбатын министиэристибэтэ оту бэлэмнээһин хаамыытын туһунан атырдьах ыйын бастакы дэкээдэтигэр иһитиннэрэр.
+1
+1
+1
+1
+1
+1
+1