Маны аах Тыа хаһаайыстыбата

От атыылаһыллар сыаната быһылынна

Тыа хаһаайыстыбатын миниистирин бастакы солбуйааччы Татьяна Осипова от ыйын 22 күнүгэр Ил Дархан уонна Бырабыыталыстыба официальнай страницаларыгар: «Одноклассниктар», «Вконтакте» социальнай ситимнэринэн быһа биэриигэ таҕыста.

Истээччилэртэн киирбит ыйытыылартан бүгүҥҥү күҥҥэ саамай сүрүннэрэ оттооһун хаамыыта, оту атыылаһар сыана туһунан буолла.

– Кыстыгы көрсө 457 тыһ. туонна от оттонуохтаах этэ да, кураанынан сибээстээн, 364 тыһ. туонна эрэ оттонор туруктаах, ол эбэтэр 93 тыһ. туонна тиийбэт. Ыраах учаастактарынан көһөн оттуур мобильнай биригээдэлэринэн 33 627 туоннаны оттуур сорук турар. Тиийбэт оту өрөспүүбүлүкэ таһыттан ситэринэргэ суоттанабыт. Ааспыт нэдиэлэҕэ миниистири солбуйааччы Николай Афанасьев Амур уобалаһыгар тиийэн, тыа хаһаайыстыбатын уобаластааҕы миниистирин Олег Турковы көрсөн кэллэ. Кэллиэгэлэрбит көмөлөһөргө бэлэмнэр, түөрт оройуон хаһаайыстыбата атыылыырга анаан оттуур буолла, ону таһынан сир түүлэһэн, мантан мобильнай биригээдэ тиийэн оттуур боппуруоһун үөрэтэ сылдьабыт.

От атыылаһыллар сыанатын сүрүннээһин федеральнай сокуоннарга сөп түбэһиннэрэн оҥоһуллар. Министиэристибэҕэ от атыыланар сыанатын олохтуур туһунан бирикээскэ илии баттанна. Сыана от хаачыстыбатыттан тутулуктанар, биир туонна үрдүк суортаах от сыаната 6 000 солкуобайынан быһылынна. Табаары оҥорооччулар бэйэлэрин икки ардыгар атыылааһын уонна атыылаһыы дуогабарын түһэрсэллэригэр маннык сыананы тутуһалларыгар сүбэлиибит, – диэтэ Татьяна Осипова.

Раиса Сибирякова, «Саха сирэ» edersaas.ru

1
2