Хайа оҕо остуоруйаны истэрин, мульткиинэни көрөрүн таптаабатаҕа баарай? Таатта улууһугар оҕо саадын иитиллээччилэригэр уонна оскуола алын сүһүөҕүн үөрэнээччилэригэр сонун, сэргэх күннэр үүннүлэр.
Кинилэргэ Дьокуускай куораттан Саха сирин норуоттарын муусукатын уонна фольклорун мусуойун үлэһиттэрэ «Дьулуруйар Ньургун Боотур» мультипликационнай киинэни уонна куукулаларынан “Таал-Таал эмээхсин”, “Тугут уонна ньиэрпэ” остуоруйалары көрдөрөллөр. Хас остуоруйа, олоҥхо кэнниттэн ыраахтан тиийбит ыалдьыттар оҕолору кытары көрсөн кэпсэтэллэр, куукулалары көрдөрөллөр, хаартыскаҕа түһэллэр. Кырачааннар куукулаларынан оонньоон, остуоруйа дьиэтин-уотун көрөн ордук астыналлар.
Бу тэрээһин Таатта улууһун култуураҕа уонна үөрэххэ управлениеларын ыҥырыытынан ыытыллар. “Кэрэҕэ айан” турне чэрчитинэн остуоруйа, олоҥхо кэһиилээх ыалдьыттар Чөркөөххө, Дьохсоҕоҥҥо, Ытык Күөлгэ оҕо саадтарын уонна алын сүһүөх кылаастар оҕолорун хабаллар.
Биһиги корр., “Саха сирэ” хаһыат, edersaas.ru