Николай Захаров-Сахаачча аатынан спортивнай комплекска остуол тенниһигэр күрэхтэһии саҕаланна. Манна, дьахталларга уонна эрэ дьоҥҥо 12-лии бастыҥ хамаанда талыллан, сүүмэрдэнэн кэлэн күрэс былдьаһар.
Күрэхтэһии туһунан СӨ физическэй култуураҕа уонна спорка туйгуна, спорт маастарыгар кандидат, Уус Алдан хамаандатын чилиэнэ Аркадий Ивановтан билиһиннэрэригэр көрдөстүм.
-Аҕыс остуолунан оонньуулар саҕаланнылар. Кылаабынай судьуйанан Бүтүн Арассыыйатааҕы категориялаах судьуйа Александр Неустроев үлэлиир. Уопсайа, бу күрэхтэһиигэ Арассыыйатааҕы категориялаах үс судьуйа үлэлиир. Маны тэҥэ, биһиги күрэхтэһиибитигэр Василий Румянцев (Уус Алдан), Ньургун Сабарайкин (Чурапчы), Анастасия Гармашова (Нерюнгри) курдук спорт маастардара кытталлар. Онон өрөспүүбүлүкэбитигэр остуол тенниһин таһыма үрдээн иһэр.
Күүстээх хамаандаларынан эр дьоҥҥо Уус Алдан, Чурапчы, Дьокуускай, Амма, оттон дьахталларга Дьокуускай, Амма, Хаҥалас буолаллар. Оонньуу түөрт бөлөххө сэрэбиэйинэн араарыллан ыытыллар. Бөлөхтөн иккилии күүстээхтэр салгыы оонньуур быраабы ылан, финалга диэки тахсан иһэллэр.
Онон «Дружба» спорткомплекс саалатыгар остуол тенниһигэр сытыы оонньуулар саҕаланнылар.
Петр Павлов.