Бу күннэргэ Бүлүү улууһун I Күүлэт П.А. Павлов аатынан орто оскуола саҥа таас тутуутун матырыйаалын өрүһүнэн улахан ууну баттаһа таһаллар.
edersaas.ru
Оскуола тутуута «Тыа сирин кэлимник сайыннарыы» федеральнай бырагырааманан үбүлэммит. Тутуу матырыйаалын аукциоҥҥа хоппут «Приоритет» тутууга ХЭТ бэлэмниир. Бу туһунан улуустааҕы МТ пресс-киинэ иһитиннэрэр.
Бүлүү өрүс хаҥас биэрэгэр, Тойон Хонуу аннынан, оскуола тутуутун матырыйаалларын быстах кэмҥэ сүөкүүр былаһааккаҕа кэлбит бетон блоктары олохтоох уолаттар сүөкээн дьаарыстаатылар.
Дьокуускайтан 500-түү туонна уйуктаах икки бааржаҕа тутуу матырыйаалын тиэйии саҕаламмыт. Улахан ууну баттаһа, оскуолаҕа былааннаммыт тутуу матырыйаалын барытын тиэйэр сорук турар.
Бэдэрээччит аны сиринэн I Күүлэккэ тутуу матырыйаалын түүннэри-күнүстэри таһар соруктаах. Ону Дьыыппа үрэх уута түстэҕинэ, тутуу матырыйаалын пантоннай муостанан туруоратыахтара.
Елена ПОТОЦКАЯ, «Саха сирэ» хаһыат, edersaas.ru
Хаартыска: «Бүлүү улууһа» МТ саайтыттан.