Оскуоланы бүтэрээччилэр талбыт биридимиэттэрин барытын туттараллар

Ааптар: 
Бөлөххө киир:

Быйыл оскуоланы бүтэрээччилэргэ сорохторугар дьол мичик гынна, сорохторго саҥа суолга үктэнэллэригэр тургутуулары бэлэмнээтэ. Бу барыта биир кэлим эксээмэни кытта ситимнээх.

edersaas.ru

Биир кэлим эксээмэн үгэс быһыытынан сыллата ыам ыйын бүтүүтэ саҕаланара. Быйылгы араспысаанньаны коронавируһунан сибээстээн, ыам ыйын бүтүүтүттэн бэс ыйын 8 күнүгэр көһөрбүттэрэ, бэҕэһээ РФ Үөрэҕириигэ министиэристибэтэ өссө көһөн биэрэрин туһунан иһитиннэрдэ. Онон биир кэлим эксээмэн хаһыс чыһыылаҕа буоларын күн бүгүн чопчу биллэрэ иликтэр. Арай, Рособрнадзор хас даҕаны барыйааны бэлэмнээбитин, ол иһигэр атырдьах ыйыгар ыытар араспысаанньа барылын оҥорон киллэрбиттэр диэн Арассыыйатааҕы сонуну тарҕатар сириэстибэлэр суруйаллар.

РФ Үөрэҕириигэ миниистирэ Сергей Кравцов орто анал үөрэххэ туттарсааччыларга үөрүүлээх сонуну иһитиннэрдэ. Биир кэлим эксээмэни (ЕГЭ) үрдүк үөрэххэ туттарсар эрэ оҕолор туттараллар. Онтон атыттарга аттестаттарыгар эксээмэнэ суох сыллааҕы сыананы туруораллар. Эмиэ даҕаны сөп дьаһал.

Аны талар эксээмэҥҥэ араастаан өйдөһүү таҕыста. Дьолго миниистир Сергей Кравцов: “Оскуола үөрэнээччилэрэ өссө 2020 сыл саҥатыгар ханнык биридимиэттэри талан туттаралларын быһаарыммыттара. Үрдүк үөрэххэ туттарсалларыгар анаан талбыт биридимиэттэрин барытын туттараллар. Манна туох даҕаны хааччах суох. Оҕо үксэ 2 биридимиэти талар, сороҕор 3-4 буолар. Бу талар эксээмэннэрэ көҕүрээбэт”, — диэн быһааран биэрдэ. Онон үрдүк үөрэххэ холонор оҕолор талбыт эксээмэннэрин барытын туттараллар.

Онтон быйыл 9-с кылааһы бүтэрээччилэргэ чахчы дьол тосхойдо. Кинилэр 4 биридимиэккэ (2 булгуччулаах, 2 талар) сүрүн судаарыстыбаннай эксээмэни (ОГЭ) туттарыахтаахтара. Маҥнай талар эксээмэни туттарбаттар диэбиттэрэ, бэҕэһээ булгуччулаах эксээмэни (математика, нуучча тыла) эмиэ туттарбат буоллулар диэн үөртүлэр. Онон быйылгы тохсустар ОГЭ курдук эксээмэни мүччү көттүлэр. Аттестаттарыгар сыллааҕы сыаналара турар.

Людмила ПОПОВА, “Саха сирэ” хаһыат, edersaas.ru

Хаартыска: vogazeta.ru.

+1
0
+1
0
+1
0
+1
0
+1
0
+1
0
+1
0