Өрөспүүбүлүкэ 11-с кылааһын бүтэрээччилэрин счеттарыгар 5000 солкуобай суумалаах төлөбүрдэр түһэн эрэллэр. Эрдэ биллэриллибитин курдук, Ил Дархан Айсен Николаев Саха сирин оскуолаларын быйыл бүтэрээччилэргэ коронавирус кириисиһинэн сибээстээн, 5-тии тыһыынча солкуобай көрүллүөҕэ диэн иһитиннэрбитэ. Төлөбүр 8000 кэриҥэ оскуоланы бүтэрээччигэ бэриллэр.
“Убаастабыллаах оскуоланы бүтэрээччилэр, пандемия, эһиги олох киэҥ аартыгар үктэнэр эппиэтинэстээх түгэҥҥитигэр уларытыылары киллэрдэ. Ол эрээри, эһиги санааҕытын түһэриэ суохтааххыт, төттөрүтүн, саҥа соруктары туруоран, олоххо эрэллээхтик хардыылыахтааххыт. Билигин эксээмэҥҥэ күүскэ бэлэмнэниэхтээххит, үөрэххитин салгыахтааххыт. Биһиги өрөспүүбүлүкэбит – биир улахан дьиэ кэргэн. Кини өрүү көмөлөһүөҕэ уонна ыарахан түгэҥҥэ өйөбүл буолуоҕа!”, — диэн Айсен Николаев бэйэтин туһаайыытыгар этэн турар.
Чокуурдаах орто оскуолатын бүтэрэр оҕо төрөппүтэ Александра Корякина бу маннык харчынан көмө кини оҕотугар сөбүгэр улахан көмө буоларын ыйар. “Өрөспүүбүлүкэбит Ил Дарханыттан өйөбүл ылар олус үчүгэй. Төһө даҕаны иллэҥэ суох буоллар, оҕолорбутун умнубат уонна көмөлөһөргө дьулуһар. Атын ханнык эбит эрэгийиэн баһылыга быйыл оскуоланы бүтэрээччилэри ити курдук өйөөбүтүн истэ иликпин. Оҕолор, чахчы, балачча уустугу көрүстүлэр, оттон инникитин саамай эппиэтинэстээх түгэн – эксээмэн. Мин Саха сиригэр олорорбунан уонна оҕолорбун манна иитэрбиттэн үөрэбин”, — диэн төрөппүт санаатын үллэстэр.
Дьокуускайдааҕы кадеттар интэринээт-оскуолаларын бүтэрээри сылдьар Александр Андреев Айсен Николаевка харчынан өйөбүлүн иһин махталын биллэрэр. “Кырдьык, дистанционнай үөрэх үтүө өрүттэрдээх эрээри, хомойуох иһин, итэҕэһэ эмиэ баар. Судаарыстыбаттан өйөбүл баара үөрүүлээх. Холобура, үрдүк үөрэххэ туттарсарга былааннамматтар — биир кэлим эксээмэни туттарбаттар. Чопчу уонна хаачыстыбалаах бэлэмэ суохтар эксээмэн туттараллара уустук. Онтон Ил Дархан төлөбүрэ дистанционнай үөрэҕи кытта сибээстээх уустуктары толуйда. Вируһу сотору кэминэн кыайыахпыт уонна үөрэнээччилэр оскуолаҕа миэстэтигэр тиийэн үөрэнэллэригэр эрэллээхпин”, — диэн этэр.
Санатан эттэххэ, төлөбүрү ылар туһугар оскуоланы бүтэрээччи үөрэммит тэрилтэтин дириэктэрин аатыгар сайабылыанньа суруйуохтаах. Биир кэмнээх төлөбүр сайабылыанньа хаһан киирбититтэн көрөн төлөнөр.
СӨ Үөрэҕин уонна наукатын министиэристибэтин пресс-сулууспата.