Оскуоланы бүтэрээччилэр өйтөн суруйууларын тиэмэлэрин хайысхалара быһаарылыннылар
Эһиил оскуоланы бүтэрээччилэр өйтөн суруйууга талар тиэмэлэрин хайысхалара быһаарыллыбыттар. Ити туһунан СӨ Үөрэҕин министиэристибэтин пресс-сулууспата Педагогическай кээмэйдээһиннэр федеральнай институттара (ФИПИ) саайтарыгар тирэҕирэн иһитиннэрэр.
edersaas.ru
Ол курдук, 2017-2018 үөрэх дьылыгар биэс тиэмэ хайысхата ыйыллыбыт: “Верность и измена”, “Равнодушие и отзывчивость”, “Цели и средства”, “Смелость и трусость”, “Человек и общество”. Ити хайысхалар эрэ буолаллар. Чопчу тиэмэлэр эксээмэн саҕаланыан иннинэ эрэ биллэллэр. Быйылгы үөрэх дьылыгар түмүктүүр өйтөн суруйуу дойду үрдүнэн ахсынньы 6, олунньу 7 уонна ыам ыйын 16 күннэригэр ыытыллыаҕа диэн суруйаллар.
Өйтөн суруйууну оскуоланы бүтэрээри сылдьар оҕолор бука бары туттараллар. Бу кинилэр биир кэлим судаарыстыбаннай эксээмэҥҥэ (ЕГЭ) киирэллэригэр көҥүлү биэрэр. Доруобуйаларынан хааччахтаах оҕолор аахпыттан суруйууну талаллара көҥүллэнэр.
Өйтөн суруйуу түмүгэр “зачет” эбэтэр “незачет” диэн туруораллар. Өскөтүн оҕо кыайан туттарбатах түгэнигэр хаттаан суруйара көҥүллэнэр.
“Саха сирэ” хаһыат, edersaas.ru
Андрей СОРОКИН хаартыскаҕа түһэриитэ.