Оскуоланы бүтэрээччилэр эксээмэн көрүҥүн уонна биридимиэттэри уларытыахтарын сөп буолуо
Биир кэлим эксээмэни (ЕГЭ) уонна түмүктүүр судаарыстыбаннай эксээмэни (ГВЭ) туттарар оҕолор, ону тэҥэ доруобуйаларынан хааччахтаах, инбэлиит-оҕолор уонна инбэлииттэр эрдэ талбыт эксээмэннэрин көрүҥүн (форма) уларытар кыахтаахтар. Ити туһунан Үөрэҕи уонна науканы кэтээн көрөр федеральнай сулууспа (Рособрнадзор) саайтыгар бэҕэһээ таҕыста.
Урукку өттүгэр маннык түгэн буолбутун өйдөөбөппүн. Туох төрүөтүнэн уларыйыы киирэн эрэрин эмиэ суруйбатахтар. Тустаах саайтка маннык кыах РФ Үөрэҕириитин министиэристибэтэ уонна Рособрнадзор «Особенности проведения государственной итоговой аттестации по образовательным программам среднего общего образования в 2021 году» кыттыгас бирикээстэрин бырайыагынан көрүллэр диэн ыйыллар. Кыттыгас докумуону Нуорма быраап аахталарын бырайыактарын федеральнай порталыгар уопсастыбаннай ырытыыга таһаарбыттар.
Санатан эттэххэ, быйыл үрдүк үөрэххэ туттарсар былааннара суох 11-с кылааһы бүтэрээччилэр, аттестат ылар туһугар ГВЭ көрүҥүнэн (форма) нуучча тылыгар уонна математикаҕа түмүктүүр судаарыстыбаннай эксээмэни (ГИА) туттараллар. Онтон үрдүк үөрэххэ туттарсар баҕалаахтар уонна биир кэлим эксээмэни (ЕГЭ) туттарааччылар аттестат ылар туһугар нуучча тылыгар биир кэлим эксээмэҥҥэ (ЕГЭ) орто сыананы ылаллара (положительный результат) эрэ наада. Сайабылыанньаны быйыл олунньу 1 күнүгэр диэри ылбыттара.
Эксээмэн көрүҥүн (форма) уонна биридимиэттэри уларытыы туһунан бирикээс бүгүҥҥүтэ чопчу быһаарылла илик. Үөрэҕи уонна науканы кэтээн көрөр федеральнай сулууспа саайтыгар таһаарбыттарыттан сылыктаатахха, олоххо киириэн сөп. Иһитиннэриини сиһилии Үөрэҕи уонна науканы кэтээн көрөр федеральнай сулууспа (Рособрнадзор) саайтыгар http://obrnadzor.gov.ru/news/uchastniki-ege-i-gve-11-v-2021-godu-smogut-izmenit-formu-sdachi-ekzamenov-i-perechen-vybrannyh-predmetov/ ыйыллыбыт сигэнэн киирэн ааҕыҥ.
Людмила ПОПОВА, “Саха сирэ” хаһыат, edersaas.ru