Ил Дархан Айсен Николаев эрдэ иһитиннэрбитинэн, быйыл оскуоланы бүтэрээччи хас биирдиитэ 5 тыһыынча солкуобайы тутуоҕа.
СӨ бырабыыталыстыбата бэҕэһээ, ыам ыйын 15 күнүгэр, бу көмөнү хайдах быһыылаахтык ылар туһунан уурааҕы таһаарда.
Бу көмө харчыны 18 сааһын туолбут выпускник бэйэтэ, оттон 18-һын туола илик выпускник төрөппүттэрэ эбэтэр сокуонунан бэрэстэбиитэллэрэ ылыахтарын сөп. Оттон 18 сааһын туолбут, ол гынан баран лицевой счета суох оҕолор эмиэ төрөппүттэрин эбэтэр сокунунан бэрэстэбиитэллэрин нөҥүө көмөнү туһаныахтара. Бу инниттэн суругунан дэбиэринэс ирдэнэр.
Көмөнү ылааччы оскуолатын дириэктэрин аатыгар сайабылыанньа суруйар. Үрдүк бэлэмнээх буолуу эбэтэр ыксаллаах быһыы-майгы эрэсиимэ буола турар оройуоннарыгар, куораттарыгар сайабылыанньаны хантаактаспакка эрэ тиэрдии учуоттаныахтаах.
Бу кэнниттэн оскуола көмөнү ылааччылар испииһэгин оройуон, куорат баһылыгар тиэрдэр. Бу дааннайдар чахчылаахтарыгар оскуола дириэктэрэ эппиэтинэһи сүгэр.
Ороуйон, куорат баһылыктара уопсай реестр оҥорон, СӨ Үөрэххэ уонна наукаҕа министиэристибэтигэр ыыталлар. Онтон тустаах биэдэмистибэлэргэ сөбүлэһиннэриигэ ыытан баран, Социальнай төлөбүрдэр кииннэригэр ыыталлар.
Бу киин выпускниктар счеттарыгар харчыны ыытар.
Оскуоланы бүтэрээччилэргэ көмө харчы СӨ Бырабыыталыстыбатын эрэсиэрбэ пуондатыттан көрүллэр.
СӨ Бырабыыталыстыбатын уурааҕын кытта сиһилии манна билсиҥ: sakha.gov.ru
Ил Дархан уонна Бырабыыталыстыба пресс-сулууспата.