Оскуолалары уонна уһуйааннары төрөөбүт тыл үөрэҕин кинигэтинэн хааччыйыахтара
Саха сирин бырабыыталыстыбата оскуолалары, уһуйааннары төрөөбүт тыллар учуобунньуктарынан хааччыйар былааны бигэргэттэ. Чугастааҕы икки сылга төрөөбүт тылларга уонна литэрэтиирэҕэ учуобунньук тиийбэт кыһалҕатын толору быһаарар былааннаахтар.
Саха сирин Ил Дархана Айсен Николаев сорудаҕынан, “2020-2024 сылларга Саха Өрөспүүбүлүкэтигэр судаарыстыбаннай уонна официальнай тыллары чөл хаалларыы уонна сайыннарыы” судаарыстыбаннай бырагыраама иитинэн үөрэх кинигэлэрин уонна босуобуйаларын оҥорууга үбүлээһин көрүллүбүт.
2021 сылга “Хотугу аҕыйах ахсааннаах норуоттар тылларынан литэрэтиирэ кэбиниэтэ”, “Саха уһуйаана” библиотечка”, “Полилингвальнай оҕо саадын библиотечката” кэмпилиэктэр, ону тэҥэ, “Ил Дархантан аудио бэлэх” бырайыак кэмпилиэгэ (саха суруйааччыларын, бэйиэттэрин аудио кинигэлэрин хомуурунньуга) тэриллибиттэрэ.
Саха тылыгар уонна литэрэтиирэтигэр 10-11-с кылаастарга аналлаах үөрэх босуобуйата, алын кылаастарга юкагир тылын уонна ааҕар кинигэтин босуобуйата, учууталларга, иитээччилэргэ мэтиэдикэ, тылдьыттар тахсыбыттара. “Айар” кинигэ кыһатын саайтыгар 1-9 кылаас саха тылын уонна литэрэтиирэтин учуобунньуктарын электроннай көрүҥнэрэ бааллар.
Быйыл 5-с кылаастарга туундара дьүкээгир тылыгар, 1 уонна 5-с кылаастарга саха тылыгар уонна литэрэтиирэтигэр үөрэх босуобуйалара тахсыахтара. Ону тэҥэ, 10-11-с кылаастарга саха тылын учуобунньугун электроннай көрүҥүн бэлэмниэхтэрэ.
Оскуолалары уонна уһуйааннары “Саха тылын, литэрэтиирэтин уонна култууратын кэбиниэтэ” уонна “Кустук” оскуола иннинээҕи үөрэхтээһин бырагырааматыгар дидактическай матырыйааллар” кэмпилиэктэринэн хааччыйыахтара.
Санатан эттэххэ, быйыл балаҕан ыйын 1 күнүттэн дойду бары оскуолалара саҥа ФГОСнан үөрэниэхтэрэ. Быйыл 1-кы уонна 5-с кылаас үөрэнээччилэрэ хапсыахтара. ФГОС саҥа ирдэбилигэр сөп түбэһэр саҥа учуобунньуктары, үөрэх босуобуйаларын оҥороллор.
СӨ Ил Дарханын уонна СӨ Бырабыыталыстыбатын пресс-сулууспата.