Оскуолаларга бүгүҥҥү балаһыанньа туругун туһунан министиэристибэ иһитиннэрэр
СӨ Үөрэҕин уонна наукатын министиэристибэтин официальнай аккауннарыгар нэһилиэнньэттэн ыйытыылар киирэллэр. Сүрүннээн өрөспүүбүлүкэ оскуолаларыгар эпидемиологическай балаһыанньаны ыйыталлар.
2020 сыл балаҕан ыйын 30 күнүнээҕи туругунан, өрөспүүбүлүкэ 649 оскуолатыгар 148 720 оҕо үөрэнэр. Олоҕурбут көрүҥүнэн (очно) 350 оскуолаҕа (53,9%) 39 843 оҕо үөрэнэр. Ыраахтан олорон (дистанционно) үөрэниигэ 46 оскуолаҕа (7%) 2 655 оҕо көспүтэ. Очнай-заочнай көрүҥүнэн үөрэтэр оскуола ахсаана 253 (39 %), онно 94 459 оҕо баар. 192 оҕо үөрэнэр 4 оскуола харантыыҥҥа сабыллыбыта.
Оскуола 266 үөрэнээччитигэр итиэннэ 21 үлэһиккэ хамсык дьаҥа баара бигэргэммитэ. Бары ыраахтан үөрэххэ көспүттэрэ.
Санитарнай-эпидемиологическай ирдэбили тутуһууга кэккэ миэрэлэр ылыллыбыттара. Ол курдук, оскуолалары тиһигин быспакка дезинфекциялыыллар, салгыҥҥа сарааса суох буоларын туһугар эмтииллэр, анал харыстанар сириэстибэлэринэн хааччыллыбыттара, оҕолор бэйэ-бэйэлэрин кытта алтыспаттарын туһугар усулуобуйа олохтоммута, хас биирдии кылааска кэбиниэт анаммыта.
СӨ Үөрэҕин уонна наукатын министиэристибэтин пресс-сулууспата.