Оскуолаларга медицинскэй үлэһити төннөрүөхтэрэ

Ааптар: 
Бөлөххө киир:

Госдуума дьокутаата Галина Данчикова “Үөрэх” национальнай бырайыагы Саха сиригэр олоххо киллэриинэн сибээстээн, норуодунай дьокутааттары, педагогическай уопсастыбаннаһы кытта көрүстэ.

edersaas.ru

Тэрээһини Ил Түмэн наукаҕа, үөрэххэ, култуураҕа, сонуну киэҥник тарҕатар сириэстибэлэргэ уонна уопсастыбаннай тэрилтэлэр дьыалаларыгар сис кэмитиэтин бэрэссэдээтэлэ Феодосия Габышева салайан ыытта.

Тэрээһин кыттыылаахтара “Үөрэх” национальнай бырайыак Саха сиригэр олоххо киириитин тула кэпсэттилэр. Госдуума дьокутаата Галина Данчикова “Үөрэх” национальнай бырайыак, уопсайа, 10 хайысхалаах диэн эттэ. Итиэннэ бу хайысхаларынан чугастааҕы үс сылга төһө үп-харчы тыырылларын билиһиннэрдэ. Тус бэйэм, “Кэлэр кэм учуутала” (“Учитель будущего”) хайысханы биһирии иһиттим. Дьэ, манна киһи сэҥээрэрэ туох баарый? Бастатан туран, үөрэх үлэһиттэрин профессиональнай маастарыстыбаларын сайыннарыы ситимин быспакка тиһиктээхтик барыаҕа итиэннэ педагогтар квалификацияларын таһымын үрдэтии бырагырааматын ис хоһооно саҥардыллыаҕа. “Тустаах бырагыраама урут даҕаны үлэлиир этэ. Билигин сүрүн болҕомтону квалификацияны үрдэтиини бэлэмнээһиҥҥэ ууруохтара. Федеральнай кииннэр тэриллиэхтэрэ (ситимнэр). 35 диэри саастаах учууталлар сэттэ уонтан итэҕэһэ суох бырыһыаннара сыһыарыллыахтара уонна үлэлэрин бастакы үс сылыгар өйөнүллүөхтэрэ”, — диэн эттэ. Ол аата, эдэр учууталларга болҕомто күүһүрүөҕэ.

Биллэн турар, “Үөрэх” национальнай бырайыак киэҥ хабааннаах уонна тутууттан саҕалаан бары эйгэни барытын хабар. Ол туһунан көрсүһүү кэмигэр СӨ үөрэҕин уонна наукатын миниистирин эбээһинэһин толорооччу Владимир Егоров сиһилии кэпсээтэ. Маныаха кини сүүнэ бырайыак чопчу Саха сиригэр хайдах быһыылаахтык киириэн билиһиннэрдэ.

Иккиһинэн, Галина Данчикова үөрэх тэрилтэлэригэр медицинскэй үлэһиттэри төнүннэрэр туһунан Госдуумаҕа сокуон барылын киллэрбиттэрин туһунан иһитиннэрдэ. Маныаха кини: “Үөрэх тэрилтэлэригэр, ордук физкултуура уруогар, оҕолор доруобуйалара эмискэ мөлтүүр түгэннэрэ аҕыйаҕа суох. Сороҕор уталыппакка суһал көмөнү оҥоруу ирдэнэр”, — диэн быһаарда. Онон үөрэх кэмигэр медицинэ үлэһиттэрэ оҕолор доруобуйаларын суһаллык эбэтэр күннэтэ кэтээн көрүүлэрин боппуруоһун бэрээдэктиир инниттэн дойду Доруобуйатын харыстабылын уонна Үөрэҕин министиэристибэлэрэ кыттыһан ыйаах бэлэмниири былаанныыллар диир.

Итини сэргэ, оскуола иннинээҕи уонна уопсай үөрэхтээһин тэрилтэлэрэ аһынан-үөлүнэн хааччыйыыларын хонтуруоллуур боппуруос эмиэ турар диэн эбэн эттэ. Онон бу икки боппуруоһу эмиэ дьүүллэһиэхпитин наада диэн бэлиэтээтэ.

Кэмитиэт бэрэссэдээтэлэ Феодосия Габышева инникитин маннык быраактыканы салгыахпыт, Госдуума сенатордарын кытта көрсүһүүлэр, көһө сылдьар мунньахтар ыытыллыахтара диэн эттэ. “РФ үөрэх туһунан” федеральнай сокуоҥҥа уонна да атын сокуон аакталарыгар уларытыылары киллэрэр ирдэнэр диэн бигэргэттэ. “Үөрэх” национальнай бырайыак олоххо киириитигэр хас биирдиилэрэ көхтөөхтүк кытталларыгар эрэнэрин биллэрдэ.

Людмила ПОПОВА, “Саха сирэ” хаһыат, edersaas.ru

Хаартыскалар: Ил Түмэн пресс-сулууспата

+1
0
+1
0
+1
0
+1
0
+1
0
+1
0
+1
0