Доруобуйа бүтүн аан дойдутааҕы күнүгэр Дьокуускай куорат баһылыгын солбуйааччы Руслан Тимофеев, дьокутааттар, куорат дьаһалтатын бэрэстэбиитэллэрэ СӨ доруобуйа харыстабылын миниистирэ Лена Афанасьевалыын көрүстүлэр.
Көрсүһүүгэ оҕолор сайыҥҥы сынньалаҥнарын тэрийэргэ Дьокуускай куорат үөрэҕин тэрилтэлэригэр мэдиссиинискэй үлэһиттэри сыһыарыы биир дьоһун суолталаах боппуруоһунан буолла.
Биллэрин курдук, 2012 сылга диэри үгүс оскуолалар бэйэлэрэ миэдиктээх этилэр. Ол эрээри, «Үөрэхтээһин туһунан» федеральнай сокуон олоххо киириэҕиттэн оскуолалар мэдиссиинискэй үлэһити штакка тутар бырааптара быһыллыбыта.
Онтон билигин куорат дьокутааттара оскуолалар бэйэлэрэ штаттаах мэдиссиинискэй үлэһиттээх буолалларын уонна үөрэх кэмигэр күн устата мэдиссиинискэй хааччыллыыны туруорсаллар. Өрөспүүбүлүкэ норуодунай дьокутаата Марина Силкина иһитиннэрбитинэн, СӨ Судаарыстыбаннай мунньаҕын (Ил Түмэн) аатыттан «РФ-га үөрэхтээһин туһунан» федеральнай сокуоҥҥа уларытыылары киллэрэргэ кэккэ этиилэр оҥоһулуннулар. Боппуруос Судаарыстыбаннай Дуумаҕа киллэриллэн, ыам ыйыгар көрүллүөҕэ уонна быһаарыллыаҕа.
«Бүгүҥҥү туругунан оскуола иннинээҕи саастаах тэрилтэлэргэ кыһалҕа быһаарылынна, 64 тэрилтэ мэдиссиинискэй үлэһиттээх буоларга көҥүллээх. Сайыҥҥы лааҕырдары эмиэ мэдиссиинискэй үлэһиттэринэн хааччыйыахха наада», -– диэн Куорат дууматын социальнай бэлиитикэҕэ бастайааннай кэмитиэтин бэрэссэдээтэлэ Айаан Васильев санаатын үллэһиннэ.
Надежда ЕГОРОВА, «Саха сирэ», edersaas.ru