Оскуолалар оптуобустаннылар

Ааптар: 
Бөлөххө киир:
Өрөспүүбүлүкэ оскуолалара оптуобустаннылар. 
РФ Бырабыыталыстыбатын 2020 с. алтынньы 1 күнүнээҕи 2525-р №-дээх дьаһалынан, Саха сирин оскуолаларыгар барыта 125 мөл.солк. суумаҕа 70 оптуобус аҕалылынна. Манна уонтан уон иккигэ тиийэ олорор миэстэлээх 51 анал ГАЗель оптуобус, сүүрбэҕэ-сүүрбэ үскэ тиийэ олорор миэстэлээх эмиэ анал ПАЗ  19 оптуобус аҕалыллыбыт.  Көлөлөр хотугу сир усулуобуйатыгар аналлаахтар диэн иһитиннэриигэ суруллар.

Эҕэрдэ тылыгар Айсен Николаев бары оскуолалар, учууталлар уонна өрөспүүбүлүкэ аатыттан РФ Бырабыыталыстыбатыгар махтанна.

«Оҕолор үөрэхтэрин хаачыстыбата, усулуобуйалара тупсаҕай буоларыгар бу олус суолталаах уонна наадалаах. Бу бырагыраама оскуола үөрэнээччилэрин тустарыгар салгыы үлэлииригэр эрэнэбин. Үөрэхтээһин өрөспүүбүлүкэ сайдыытыгар сүрүн хайысханан буолар итиэннэ бу хайысха өйөнүллүөхтээх, ол иһигэр материальнай-тэхиньиичэскэй баазаны бөҕөргөтөргө. Биһиги өрөспүүбүлүкэбит киллэрбит этиилэрэ учуоттаныллан, ГАЗеллэр хотугу тыйыс усулуобуйаҕа сөп түбэһэр курдук оҥоһуллубуттара олус үчүгэй«, — диэтэ Айсен Сергеевич.

Айсен Николаев үөрүүлээх тэрээһиҥҥэ биэс оскуола салайааччытыгар саҥа көлөлөр күлүүстэрин туттарда.

Оптуобустар үөрэх хаачыстыбатын үрдэтэргэ өр, үчүгэйдик сулууспалаан көмө, тирэх буолалларыгар баҕарда.

Эҕэрдэ тылга өрөспүүбүлүкэ оскуолаларын салалталарын ааттарыттан Нам улууһун I Хомустаах орто оскуолатын дириэктэрэ Ульяна Атласова хардарда. Кини РФ Бырабыыталыстыбатыгар уонна өрөспүүбүлүкэ салалтатыгар маннык улахан бэлэх иһин махтанна. Дириэктэр оптуобус оҕолор олимпиадаларга, күрэхтэһиилэргэ эрэ кытта баралларыгар буолбакка, култуурунай сынньалаҥҥа баралларыгар кытары олус наадалааҕын бэлиэтээтэ.

СӨ Ил Дархан уонна Бырабыыталыстыба пресс-сулууспата

Андрей Сорокин (СИА) хаартыскаларга түһэриитэ

+1
0
+1
0
+1
0
+1
0
+1
0
+1
0
+1
0