Сүрүн Тырааныспар

Оскуолалар оптуобустаннылар

СӨ Бырабыыталыстыбатын бэрэссэдээтэлин солбуйааччы Сергей Местников тоҕус оскуола дириэктэригэр уонна бэрэстэбиитэллэргэ оптуобустар күлүүстэрин туттарда.

Оҕолору тиэйэргэ бары ирдэбилгэ эппиэттиир уонна тымныыны тулуктаһар көлө диэн бэлиэтэнэр.
Арассыыйа Бэрэсидьиэнэ Владимир Путин сорудаҕын толоруу чэрчитинэн, быйыл Саха сирин оскуолаларыгар 82 оптуобус ананна. Оптуобустар федеральнай бүддьүөт суотугар атыылаһыллыбыттар уонна Дьокуускай куорат оскуолаларыгар, 27 улууска, ол иһигэр Арктика оройуоннарыгар ыытыллыбыттар.
СӨ Аҕа Баһылыга Айсен Николаев оскуола оптуобустарын саҥардыыга, көлөлөр хотугу усулуобуйаҕа эппиэттэһэллэригэр өрөспүүбүлүкэ санаата, этиитэ учуоттанарын туһунан этэн турар.
Өрөспүүбүлүкэ оскуолаларын аатыттан Арассыыйа Бырабыыталыстыбатыгар уонна Саха Өрөспүүбүлүкэтин салалтатыгар махтал тылларын Хаҥалас улууһун Өктөм орто оскуолатын дириэктэрэ Калиста Афанасьева тиэртэ.
Санатан эттэххэ, федеральнай бырагыраама иитинэн былырыын оскуолаларга анаан 72 оптуобус, 2019 сыллаахха — 47 көлө кэлбит. Балар бары улуустарынан оскуолаларга тарҕатыллыбыттар.
Хаартыскаларга Андрей Сорокин (СИА) түһэриилэрэ.
0
0
Telegram @edersaas20